Novas

mércores, 13 de novembro de 2019

Un total de 17 proxectos preséntanse ao Premio Solidario Cidade de Ferrol

O xurado reunirase o 27 de novembro e o premiado recibirá un cheque de 5.000 euros para financiar a súa iniciativa nun acto que presidirá o alcalde Ángel Mato no mes de decembro


Un total de 17 proxectos solidarios presentáronse á decimosegunda edición do Premio Solidario Cidade de Ferrol, impulsado polo Concello, que cada ano premia iniciativas e programas desenvolvidos no ámbito da solidariedade, a cooperación e o voluntariado promovidos tanto por entidades sociais como por persoas físicas. 


En concreto, as entidades participantes no certame organizado pola concellería de Benestar Social, que dirixe Eva Martínez, son: Síndrome Down. Teima Ferrol, co proxecto Cociña con Down; o Refuxio da Fundación do Santo Hospital de Caridade, co programa Novo Futuro, Querer é Poder; Asotrame, con Como en Casa; ASCM, con Sportod@s Ponlle Cor á Vida; Sogap Saharaui, con Axuda alimentaria nos campamentos de refuxiados saharauis; Acción Familiar, co proxecto Acompáñame, tempo de lecer; Cáritas, da man do seu programa de atención integral a persoas sen fogar Dentro-Fora; o Secretariado Gitano SFG, con Promociona polo éxito escolar da poboación xitana; Parkinson, que presentou Unha postura cara ao parkinson; Cogami, co proxecto Servizo dedaleira; Aecc Loita contra o Cancro con O carriño Don Amable; Aspace, con seu Servizo de Atención Temperá; Saude Mental Ferrol, Eume e Ortegal, cos proxectos Fiando Vivenzas e Monicreques Solidarios; Asfedro da man da iniciativa Educando no Lecer, Infodrogas; Fundación Autismo Coruña, con Ao Teu Carón; e, por último, o Banco de Alimentos Rías Altas, que presenta o seu programa de atención das necesidades das asociacións que integran a entidade. 

Martínez sinalou que ademais de ser unha boa oportunidade para “recoñecer e valorar o traballo realizado por las entidades”, o premiado recibe unha axuda “para desenvolver o reforzar o seu proxecto”. Apuntou que “o feito de que se presentasen 17 iniciativas demostra o grao de implicación do noso movemento social”. 

Acto de entrega presidido polo alcalde 
O próximo día 27 de novembro, ás 11 horas, reunirase o xurado presidido pola concelleira de Benestar Social e integrado por un membro de cada grupo municipal con representación no pleno, o Fondo Galego de Cooperación e a Asociación de Persoas Xordas, entidade gañadora na pasada edición. 

O premio consistirá na entrega dun distintivo solidario e o patrocinio e divulgación do proxecto, así como dunha dotación económica de 5.000 euros para financiar o proxecto gañador. O acto de entrega, presidido polo alcalde de Ferrol, Ángel Mato, terá lugar no mes de decembro. 

Dúas categorías a partir do ano que vén
 A edila Eva Martínez informou tamén de que se está analizando a posibilidade de ampliar o galardón. Así, a partir do ano que vén crearíase unha segunda categoría do Premio Solidario Cidade de Ferrol dedicada especialmente ao recoñecemento de proxectos de cooperación, mentres que a primeira quedaría para os de voluntariado e solidariedade. 




Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar