Novas

xoves, 28 de novembro de 2019

O teatro infantil de balde chega esta fin de semana ao Torrente e ao Teatro Jofre da man dos programas Apego e Festea

A Biblioteca celebra mañá venres, ás 20 horas, o contacontos para adolescentes e adultos “¿Micromachista eu?” no marco dos actos programados polo Concello con motivo do 25N


O teatro infantil de balde chega esta fin de semana ao Torrente e ao Teatro Jofre da man dos programas Apego e Festea

O teatro gratuíto para nenos chega este fin de semana a dous importantes espazos de Ferrol da man do programa Apego, de Normalización Lingüística e dirixido a fomentar e mellorar a transmisión da lingua galega, e de Festea. O sábado, ás 18.30 horas, o Teatro Jofre acollerá a representación da obra Historia dunha gaivota e do gato que lle ensinou a voar, da compañía andaluza Búho Maravillas. Trátase dunha nova sesión do festival infantil do Concello que exporá valores como a amizade, o respecto ao medio ambiente, a lealdade, e a honra.


Pola súa banda, o centro Torrente Ballester ofrece o domingo, ás 12 horas, o espectáculo O lobo e a lúa, unha peza teatral tenra, divertida e intrigante onde os seus personaxes conviven a pesar das súas diferenzas. Unha obra que transcorre sempre de noite, á luz da lúa. Unha historia de amizade, superación dos propios medos e de amor e dirixida ao público familiar a partir de 3 anos. A próxima sesión de Apego no Torrente será o día 8 de decembro, coa actuación Misterio de Nadal, da compañía Polo Correo do Vento. Trátase dun contacontos e música no que dous nenos son fans de Sherlock Holmes. Algo estraño sucede en Nadal na súa vila e comezan unha investigación. 

Proseguen as actividades polo 25N 
O programa de actividades do Concello de Ferrol con motivo da celebración o pasado luns do Día Internacional da Eliminación da Violencia contra a Muller proseguen esta fin de semana. Mañá venres terá lugar o roteiro Ferrol en Feminino, que sairá ás 17 horas da Fonte da Ranita, no porto de Curuxeiras. Pola tarde, ás 20 horas, a Biblioteca municipal da Praza de España celebrará o contacontos para adolescentes e adultos ¿Micromachista eu?, co autor Caxoto.

Fotografías de máis 40 países 
Esta fin de semana tamén pode visitarse no Torrente Ballester Vidas, a exposición fotográfica do ferrolán Gabriel Tizón que recolle imaxes captadas en máis de 40 países. Céntranse en persoas que viven “en condicións que ningún ser humano debería vivir”, segundo o propio autor. Dentro destes “inocentes”, Tizón pousa a súa mirada especialmente nos nenos e nas nenas. Este traballo serve para “recordar e amosar á cidadanía que existen” e tamén para “loitar contra a tortura do olvido”. A exposición consta de 60 fotografías de 60x40 centímetros e 6 máis de gran formato, de 200x150 centímetros. Ademais, inclúe a exhibición do documental O silencio das persoas refuxiadas, realizado por Tizón na chamada ruta dos Balcáns ao longo dos tres últimos anos. 

A mostra é gratuíta e estará aberta ao público ata o próximo 15 de febreiro, en horario de 11 a 14 e de 17 a 21 de martes a sábado, e de 11 a 14 os domingos e festivos (luns, pechado). Para organizar visitas para grupos hai que consultar no Torrente. 

Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar