Novas

luns, 11 de maio de 2020

Traballos para compactar a terra arredor dos tilos deixarán mañá a praza de Armas lista para a súa apertura ao público

Unha pequena área ao pé do pazo municipal xunto á rúa Rubalcava permanecerá pechada para que nos próximos días se poidan colocar as pedras a medida que rematarán a obra


Traballos para compactar a terra arredor dos tilos deixarán mañá a praza de Armas lista para a súa apertura ao público

A praza de Armas estará lista para a súa apertura ao público nos próximos días. Está previsto que mañá se leven a cabo traballos para compactar a terra arredor dos tilos, uns labores que quedaron pendentes debido á necesidade de que o solo asentase de forma natural antes de poder acometelos. Unha vez finalizados, o novo espazo público estará en condicións para a súa apertura, polo que, de non xurdir ningún imprevisto, o valado que percorre o perímetro podería retirarse o próximo mércores. 


Unicamente quedaría pechada unha pequena parte situada ao pé do pazo municipal e próxima á rúa Rubalcava. Nese punto quedan pendentes de colocar varias pezas de granito que están a ser preparadas de forma específica. Debido á complexidade do remate desa pendente, foi necesario crear elementos a medida, cos perfís adecuados para salvar o desnivel de maneira suave. Ademais, nesa área existen instalacións eléctricas, que aumentaron a complicación do acabado definitivo. Foi necesario agardar a que estivesen asentadas as lousas da explanada ante o Concello e da beirarrúa que baixa pegada ao edificio por Rubalcava para verificar as dimensións exactas e os ángulos destas pezas que se espera que cheguen nos próximos días para que poidan ser colocadas, co que a praza quedaría definitivamente rematada. 

A remodelación da praza de Armas é unha operación cofinanciable polo Fondo Europeo de Desarrollo Regional (Feder) no marco do Programa Operativo Plurirregional de España Feder 2014-2020 ao abeiro da Estrategia de Desarrollo Urbano Sostenible e Integrado (Edusi) “Ría de Ferrol, Cidade 2020”.

Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar