Novas

martes, 06 de outubro de 2020

O Concello inicia o sábado unha gran recollida de produtos para doar ao Banco de Alimentos

A concelleira de Benestar Social, Eva Martínez Montero, e o de Seguridade, Germán Costoya, presentaron xunto co coordinador da entidade, Manuel González, unha nova campaña municipal co fin de aumentar as reservas do banco


O Concello inicia o sábado unha gran recollida de produtos para doar ao Banco de Alimentos

O Concello de Ferrol poñerá en marcha este mesmo sábado unha gran recollida de produtos para doar ao Banco de Alimentos Rías Altas (Av Nicasio Pérez, 32, no polígono industrial da Gándara), tal e como anunciou esta mañá a concelleira de Benestar Social, Eva Martínez Montero, en rolda de prensa xunto co Germán Costoya, concelleiro de Seguridade, e o coordinador da entidade, Manuel González. 


O fin da campaña, explicou a edil, é que a sociedade ferrolá, “que é moi solidaria”, colabore co banco doando alimentos que merque nos establecementos participantes, ata o momento Lidl, Alcampo, Gadis, Eroski, Carrefour e Supercor. Pola súa banda, se ben Mercadona non participa directamente na campaña, realizará unha doazón cos produtos que escaseen tras finalizar a gran recollida. Participarán tamén os tres mercados municipais de Caranza, Recimil e A Magdalena. 

A iniciativa ponse en marcha grazas á colaboración entre as concellerías de Benestar Social e de Seguridade que, “unha vez máis”, dixo Martínez Montero, “traballamos de forma conxunta para axudar aos máis vulnerables”. Será a Agrupación de Voluntarios de Protección Civil (AVPC) a encargada de recoller os alimentos dos establecementos e trasladalos á nave do banco. Costoya, pola súa banda, quixo agradecer o labor desenvolvido pola agrupación, “sempre cunha disposición máxima a colaborar”. 

O coordinador do Banco de Alimentos agradeceu ao Concello de Ferrol a “súa vontade de traballar con nós, sempre ao quite”, dixo, “para chegar aos máis necesitados”. A entidade axuda a preto de 4.000 persoas a través das 40 asociacións ás que subministra alimentos. Neste punto, González explicou que o recente descenso das reservas do banco débese ás “dificultades que temos agora, polo covid-19, para desenvolver recollidas de alimentos co voluntarios”. Os clientes “non saben que recollemos alimentos porque é fácil que non se fixen nos carteis”. Indicou que os alimentos que máis se necesitan son: leite,  colacao, galletas, conservas, aceite, fariña, legumes e azucre, entre outros.
A campaña comeza o día 10 de outubro e alargarase entre 15 e 30 días dependendo do establecemento participante.

Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar