Novas

xoves, 15 de outubro de 2020

O Concello presenta unha nova edición do festival infantil Festea, que comeza o sábado no Torrente Ballester

O concelleiro de Cultura, Antonio Golpe, deu a coñecer esta mañá a programación, que conta con 11 espectáculos de balde ata finais de ano, e destacou a “calidade” das compañías e o “firme compromiso” do goberno local coa “cultura segura”. O programa inclúe o estreo da adaptación da obra ‘O príncipe feliz’, de Oscar Wilde, a peza ‘Úniko’, premio á Mellor Interpretación Feten 2020, e ‘O tesouro de Barracuda’, premio Barco de Vapor


O Concello presenta unha nova edición do festival infantil Festea, que comeza o sábado no Torrente Ballester

O Concello de Ferrol, a través da concellería de Cultura, que dirixe Antonio Golpe, inicia esta fin de semana a quinta edición do festival infantil Festea, que contará ata finais de ano con 11 espectáculos de balde dirixidos ao público familiar. 


O concelleiro responsable da área presentou esta mañá a programación, que se desenvolverá no Teatro Jofre e no centro cultural Torrente Ballester. Golpe destacou a “calidade das compañías e dos espectáculos que, un ano máis, inclúe Festea”. O edil manifestou que a celebración do festival infantil “é unha mostra mais do firme compromiso do Concello de Ferrol pola cultura segura”. Cumprimos polo tanto un dobre obxectivo, por un lado manter o noso apoio ao tecido cultural e, por outro, ofrecer aos nosos pequenos unha dose de alegría e ilusión despois de meses de confinamento, que foi especialmente duro para os nenos”. 

Golpe expresou esta mañá que Festea logrou converterse nunha sinal de identidade da cidade “coa que ademais queremos afacer ao público infantil a acudir ao teatro para que de adultos manteñan o seu interese polas artes escénicas”. 

Unha xeración Festea 
O concelleiro estivo acompañado por Plamen Ivanov Dipchikov, coordinador do festival, quen aproveitou para presentar a Gusty —o boneco que pon cara á marca Festea— e agradecer ao Concello de Ferrol a súa aposta pola iniciativa e “haber logrado xa algo moi importante, crear unha xeración Festea”. 

Unha programación con premios Feten e Barco de Vapor 
A programación da quinta edición de Festea, que comeza este sábado, 17 de outubro, e remata o 6 de decembro, inclúe once espectáculos. O primeiro será ‘A viaxe de Rosalía’, da compañía galega Larraitz Producións Artísticas, unha obra en galego na que Francisca do Campo, cóntanos a historia da súa querida afillada Rosalía de Castro. Cargada de maletas, teas, zapatos e libros, comparte a traxectoria dun símbolo irrenunciable para a cultura galega. Será no Torrente Ballester ás 18.30 horas.
 
O domingo 25 de outubro, ás 12.30 horas no Teatro Jofre, a compañía Búho Maravillas estrará a adaptación da obra de Oscar Wilde ‘O príncipe feliz’, unha historia de amizade e empatía. O mesmo día, ás 18.30 horas, o Torrente Ballester acolle ‘A Granxa’, da mesma compañía, unha obra que narra a procura dun amigo incondicional. 

Xa en novembro, o domingo día 1, ás 12.30 horas, a compañía A la Sombrita representará no Jofre a máis estraña historia de piratas ‘O Tesouro de Barracuda’, un espectáculo recomendado pola Red Española de Teatros e Premio El Barco de Vapor. Pola tarde, ás 18.30 horas, o Torrente ofrecerá ‘Contos de poucas luces’, da mesma compañía, un paseo polas orixes dos contos, desde a súa creación nas cavernas co descubrimento do lume. 

‘De gatos e ratos’, de Teatro de Carmen, estará no Torrente Ballester o domingo 8 de novembro, ás 12.30 horas, para representar unha historia que fala da amizade e a superación das diferenzas dos seus personaxes. O día 15, no Jofre ás 12.30 horas, Teatro Paraíso sube ao escenario ‘Úniko’, Premio á Mellor Interpretación FETEN 2020.

Mestura de maneira sabia e divertida o monicreque e o teatro e convida a reflexionar sobre a convivencia, a autoestima, o apego, a educación, a tristeza e o medo ao descoñecido. Pola tarde, ás 18.30 horas, o Torrente Ballester, ofrecerá ‘O galo quirico e os seus amigos’, da compañía Títeres Seisdedos, un espectáculo en galego de marionetas tradicionais con teatriño de cartón e música en directo. 

O domingo 29 de novembro, ás 12.30 horas tamén no Torrente, a compañía Cachirulo ofrecerá ‘A cabeza do dragón’, un espectáculo en galego que narra unha divertida comedia baseada na obra de Valle-Inclán con princesas, bandidos e dragóns. 

No mes de decembro, o sábado 5 ás 12.30 horas, o centro cívico acollerá ‘Ratiño Pérez, a verdadeira historia’, de Teatro Plus, que reflexiona sobre a posibilidade de cambiar o mundo. A programación de Festea rematará o o domingo 6 no mesmo espazo ás 12.30 horas con ‘Desexos pequenos’, un belo espectáculo sobre as tristes andanzas e liberalizadores soños da pequena cerilleira unha fría Noitevella. 

Tal e como explicou o coordinador do programa, esta nova edición de Festea conta con tres espectáculos de gran formato —O príncipe feliz, O tesouro de Barracuda e Úniko —, e outros tantos creados e dirixidos por mulleres: A viaxe de Rosalía, Desexo Pequenos e De gatos e ratos. 

As entradas, todas de balde, poden adquirirse no Teatro Jofre en horario habitual: xoves e venres de 11.00 h a 13.00 horas e de 18.00 h a 20.00 horas. O mesmo día da función, de de 11h a 13horas no Teatro Jofre e unha hora antes de que comece a representación no lugar do espectáculo. O número máximo de entradas por persoa serán catro. 







Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar