Novas

martes, 24 de novembro de 2020

O goberno local reclama á Xunta que reconsidere a eliminación do SAF extraordinario, que en Ferrol está a atender na actualidade a 21 maiores

O grupo municipal socialista levará ao pleno deste xoves unha moción para pedir ao goberno autonómico a ampliación do programa, que finalizará o 1 de decembro. A concelleira de Benestar Social, Eva Martínez Montero, insta á Xunta a reconsiderar a decisión de eliminar unha asistencia posta en marcha para a “atención urxente e temporal” das persoas maiores afectadas polo primeiro estado de alarma


O goberno local de Ferrol levará ao pleno deste xoves unha moción pola que reclaramará á Xunta de Galicia que reconsidere a decisión de eliminar a partir do próximo 1 de decembro o servizo de axuda no fogar (SAF) de carácter extraordinario, posto en marcha pola Consellería de Política Social para a “atención urxente e temporal das persoas maiores que se viron afectadas pola situación do anterior estado de alarma pola covid-19” e o manteña, ao menos, durante todo o presente estado de alarma, tal e como explicou esta mañá a concelleira de Benestar Social, Eva Martínez Montero. 


A edil asegurou que deste servizo se viron beneficiados en Ferrol un bo número de maiores, non só usuarios dos centros de días que estiveron pechados durante o primeiro estado de alarma, senón outros que, por diversas razóns vencelladas a esta situación, non teñen outra forma de atención. De feito, malia a apertura destes centros de día dende o 15 de xullo e malia a prohibición expresa de non tramitar máis altas dende o 30 de setembro, a día de hoxe son 21 os homes e mulleres os que están a recibir cobertura deste SAF extraordinario, “unhas persoas que dende o 1 de decembro quedarán desprotexidas neste estado de emerxencia social e sanitaria”, apuntou a concelleira. 

Un “erro” non prorrogar o servizo 
Se ben é certo que a unidade de dependencia dos servizos sociais do Concello, ante a comunicación de eliminar o servizo extraordinario, xa informou ás persoas usuarias da decisión da administración autonómica e se está a tramitar o cambio de recurso ou da propia dependencia, a concelleira considera un “erro” non permitir que dito servizo se prorrogue seis meses. “Ferrol está sufrindo esta segunda ola con moita máis virulencia que a primeira, e isto xerará moitos casos de necesidade de asistencia puntual e urxente para confinamentos puntuais, polo que agora máis que nunca é necesario manter o recurso”, afirmou Martínez, que se puxo a disposición da Consellería para acadar un acordo que permita asumir este recurso “tratando de non xerar desigualdade” e garantindo a cobertura do mesmo durante este período de seis meses. O Concello de Ferrol asumiu ata o momento o copago do SAF extraordinario, e leva gastadas 6.000 horas.

Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar