Novas

mércores, 25 de novembro de 2020

O Concello abre o prazo para participar no encontro virtual polo Día Internacional do Voluntariado

A concelleira de Benestar Social, Eva Martínez Montero, e a vicerreitora do campus de Ferrol, María Jesús Movilla, abrirán unha xornada na que intervirán voluntarios das entidades ASCM, Cáritas, Xeración e das oficinas de voluntariado do campus de Ferrol e dos servizos sociais municipais. O venres desenvolverase un novo curso de formación sobre Hixiene Alimentaria —antiga Manipulación de Alimentos— co fin de seguir “apostando por un voluntariado de calidade”


O Concello abre o prazo para participar no encontro virtual polo Día Internacional do Voluntariado

O Concello abriu hoxe o prazo de inscrición no encontro virtual polo Día Internacional do Voluntariado, que terá lugar o 4 de decembro a partir das 10.30 horas. Trátase dunha actividade impulsada pola concellería de Benestar Social, da que é titular Eva Martínez Montero, co fin de abordar o actual panorama do voluntariado desde diferentes perspectivas. 


A edil e a vicerreitora do campus de Ferrol, María Jesús Movilla, serán as encargadas de inaugurar a xornada, para dar a súa visión do traballo desenvolvido polo colectivo tanto no Concello como na Universidade. A continuación intervirán representantes voluntarios das entidades ASCM, Cáritas, Xeración e das oficinas de voluntariado do campus de Ferrol e do Concello. A inscrición, de balde, pode facerse desde hoxe ata o 2 de decembro incluído a través do enlace https://bit.ly/2UZyUfp e o programa pode consultarse en https://bit.ly/3nN04CC.

Prosigue a formación “de calidade” dos voluntarios da oficina municipal 
Desde a reactivación da Oficina de Voluntariado do Concello de Ferrol, a finais de setembro, a concellería de Benestar Social apostou por ofrecer aos seus membros unha “formación de calidade” tanto básica como especializada, tal e como lembra a concelleira. Neste senso a edil sinala que o Concello de Ferrol “aposta de forma decidida ofrecer o mellor servizo posible aos nosos veciños, e dita formación impartiraa o propio Concello”. 

Desde entón o Concello ofreceu varios cursos de formación, e o seguinte terá lugar este mesmo venres, 27 de novembro, de 16:30 a 20:30 sobre Hixiene Alimentaria —antiga Manipulación de Alimentos—, no salón de actos do Edificio Social. Participarán 12 persoas e impartiralo Francisco José Teijido López, xefe do departamento de Sanidade del IES Leixa Ferrol. 

A Oficina de Voluntariado do Concello conta xa con medio centenar de membros. As persoas interesadas poden inscribirse en https://www.ferrol.gal/Shared/Contidos/89.

Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar