A distinción de ‘Ferrolán do Ano 2020’ recae nesta ocasión no persoal da Área Sanitaria de Ferrol —sanitario facultativo, sanitario no facultativo e non sanitario—, tal e como acordaron por unanimidade os grupos municipais en sesión plenaria como recoñecemento a súa profesionalidade, vocación de servizo e entrega incondicional na loita contra a pandemia pola covid-19. Ao acto acudirá unha representación das corporacións municipais de Ferrol e Lugo, o conselleiro de Sanidade, Julio García Comesaña, o xerente da Área Sanitaria de Ferrol, Ángel Facio, e tres representantes dos homenaxeados: Andrés Rey, Genma García e Sabela Sánchez. No Teatro Jofre haberá tamén unha pequena representación do persoal da Área Sanitaria de Ferrol. Este ano non haberá insignias de ouro. 

Durante o acto, que comezará ás 12.15 horas, Rey, García e Sánchez firmarán no Libro de Ouro do Concello e proxectaranse dous vídeos dedicados aos homenaxeados, un deles musical. Intervirán o alcalde de Ferrol, Ángel Mato, a alcaldesa de Lugo, Lara Méndez, os tres representantes dos homenaxeados e o conselleiro de Sanidade. O acto incluirá tres actuacións: Cloud number 9, de Bryan Adams; Eso que tú me das, de Jarabe de Palo; e Los abrazos prohibidos, de Vetusta Morla.