Novas

xoves, 07 de xaneiro de 2021

O alcalde chama a saír da crise “cun sistema público de saúde máis forte” como mecanismo “imprescindible” para a “igualdade de oportunidades”O alcalde chama a saír da crise “cun sistema público de saú

Ángel Mato, xunto coa rexedora lucense, o conselleiro de Sanidade e o primeiro tenente de alcalde de Ferrol, entregou a distinción de ‘Ferrolán do Ano’ ao persoal da Área Sanitaria nun acto no Teatro Jofre marcado pola pandemia da covid-19. Ambas cidades renovaron a súa irmandade, que nace de “compartir obxectivos baseados no ben común”, como “camiño para construír un futuro mellor”, dixo o rexedor


O alcalde chama a saír da crise “cun sistema público de saúde máis forte” como mecanismo “imprescindible” para a “igualdade de oportunidades”O alcalde chama a saír da crise “cun sistema público de saú

O Concello de Ferrol celebrou esta mañá a festividade de San Xiao co tradicional acto de entrega da distinción de ‘Ferrolán do Ano’ nun acto pechado ao público aínda retransmitido en directo e marcado polas medidas de seguridade e protección por mor da pandemia. O recoñecemento recaeu nesta ocasión no persoal da Área Sanitaria de Ferrol —sanitario facultativo, sanitario no facultativo e non sanitario—, tal e como acordaron por unanimidade os grupos municipais en sesión plenaria. 


Á festividade estaba invitada unha representación da corporación municipal de Lugo, cidade coa que Ferrol mantén unha irmandade oficial dende hai xa máis de 20 anos. Tamén o conselleiro de Sanidade, Julio García Comesaña, e o xerente da Área Sanitaria, Ángel Facio. 

A tenente de alcalde e concelleira de Economía, Facenda e Emprego, María Teresa Deus, asistiu á misa do patrón na concatedral de San Xiao e a continuación tivo lugar no Teatro Jofre o acto central da festividade, que comezou coa actuación musical de Carlos Mosquera (Mos) e Bea Rivas, que interpretaron Cloud number 9, de Bryan Adams, e a firma no Libro de Ouro do Concello dos tres representantes do persoal homenaxeado: Sabela Sánchez Trigo, facultativa especialista en Medicina Interna, como representante do persoal sanitario facultativo; Gemma García Rivera, enfermeira e supervisora no servizo de Urxencias, como representante do persoal sanitario no facultativo; e, por último, Andrés Rey Jove, enxeñeiro adscrito ao servicio de mantemento, como representante do persoal no sanitario da área sanitaria. 

Tras a interpretación de Please don’t talk to me before my morning coffee, de O Sister, a cargo dos músicos Mosquera e Rivas o alcalde de Ferrol, Ángel Mato, destacou na súa intervención que se trataba dunha cerimonia “certamente especial”. As butacas “que quedan hoxe libres neste teatro”, dixo, “lémbranos que vivimos aínda momentos moi complicados, pero penso que tamén vemos nelas o baleiro que deixaron os milleiros de persoas que xa non están con nós a causa da pandemia”. A todos eles, ás súas familias e aos seus achegados trasladou “o pesar do Concello e de toda a cidadanía”. 

Mato deu as grazas a todos os homenaxeados deste ano, o persoal da Área Sanitaria de Ferrol. “Moitísimas grazas por todo o traballo que fixestes e que sabemos que ides seguir facendo”, dixo. “No medio das calamidades atopamos xente na que mirarnos e cuxos actos nos empuxan a ser mellores e seguir adiante”, sinalou, e agradeceu a presencia dos representantes do persoal sanitario, persoas de “vontade inquebrantable que se destacaron, e continúan facéndoo, como a vangarda da nosa sociedade na loita contra a covid”. Sobre o seu labor, o alcalde lembrou que “poucas situacións son comparables a ter nas propias mans a vida de persoas afectadas por unha enfermidade da que, cando comezou a estenderse, apenas se sabía que era unha das máis contaxiosas ás que nos enfrontaramos nunca antes e que, convén non esquecelo, mata”.

Xuntos, continuou o alcalde ferrolán, “co empeño de non abandonar a ninguén”, dixo, “somos mellores e máis fortes”, e o vínculo que hoxe renovaron as cidades de Ferrol e Lugo, a irmandade que “nace de compartir obxectivos baseados no ben común, é o camiño para construír un futuro mellor”, apuntou.

A solidariedade como alicerce 
Esa solidariedade, dixo Mato, é o “alicerce sobre o que construír neste 2021 que comeza todo aquelo que a crise do 2020 foi derrubando”, e chamou a saír da crise “cun sistema público de saúde máis forte” como mecanismo “imprescindible”, xunto á educación, para a “igualdade de oportunidades” entre todas as persoas. 

Expresou o seu desexo de que a crise se converta nunha “oportunidade” para a cidade, especialmente para Navantia como “motor económico de toda unha comarca”, e mencionou cuestións como a “imprescindible carga de traballo ata o inicio do programa de fragatas F-110” e o dique cuberto para o estaleiro ferrolán, para ser “competitivo durante as próximas décadas e afianzarse entre os mellores do mundo na súa categoría”. Sinalou tamén as potencialidades da cidade, que encaixan “cos modelos de transición enerxética en marcha en medio mundo” e lembrou a necesidade de apostar polas enerxías verdes a través da I+D+I, a creación dun centro de investigación e pola posibilidade de instalar eólica mariña nas costas galegas. 

O alcalde pechou a súa intervención agradecendo á alcaldesa de Lugo, Lara Méndez, a súa presenza e a todos os ferroláns o seu “xeneralizado comportamento exemplar dende que hai case dez meses as nosas vidas viraron dunha maneira impensable”. 

Discurso de Lara Méndez 
A alcalde de Lugo destacou pola súa banda os lazos entre ambas cidades e dedicou gran parte das súas palabras a resaltar o labor desenvolvido polo persoal sanitario facultativo, sanitario no facultativo e persoal no sanitario á hora de afrontar o virus. Son momentos “duros e difíciles”, dixo, e “o voso traballo foi más alá do profesional, tivo unha clave persoal”, polo que “nos unimos ao recoñecemento que o Concello de Ferrol fai aos traballadores da Área Sanitaria de Ferrol”. 

Coincidiu co alcalde de Ferrol en apostar por reforzar un estado de benestar e sanitario que de resposta ao “día a día”. Tamén na necesidade de inverter en I+D+I. Respecto ao futuro, Méndez expresou que aínda hai “medo, incerteza e unha gran carga psicolóxica”, o 2021 “é un ano de esperanza e ilusión para recuperar canto antes certa normalidade e seguir avanzando”. 

A alcaldesa de Lugo destacou o labor desenvolvido polos municipios durante a pandemia, a administración “máis preto á cidadanía”. Os concellos “actuamos como muro de contención, como escudo social. Entendemos que era o primordial”. Méndez pechou a súa intervención mostrando o seu “respecto, admiración e gratitude aos colectivos homenaxeados. 

A continuación, ambos alcaldes intercambiaron agasallos de recordo da irmandade. O de Ferrol entregou un azulexo que reflexa a fachada do Teatro Jofre con motivo da conmemoración do 40º aniversario do falecemento de Rodolfo Ucha e a de Lugo, a figura dun carballo de Sargadelos.

Tras unha nova interpretación musical, neste caso de Los abrazos prohibidos, de Vetusta Morla, precedeuse á lectura do acordo plenario de 26 de novembro de 2020 sobre a distinción ‘Ferrolán do Ano’ e proxectouse un vídeo dedicado ao labor e traballo en equipo desenvolvido polos homenaxeados que deu paso á entrega da distinción. Mato, xunto coa rexedora lucense, o conselleiro de Sanidade e o primeiro tenente de alcalde de Ferrol, Antonio Golpe, entregou o recoñecemento aos representantes dos colectivos do persoal da Área Sanitaria. 

Rey Jove, tras recibila, lembrou aos seus compañeiros: persoal de lavandería, de limpeza, telefonistas, tamén transportistas, celadores, informáticos e administradores, entre outros. Deu as grazas ao Concello de Ferrol por un recoñecemento “colectivo” a “tantos traballadores de diferentes sectores”. Entre todos, dixo, “mantivemos o sistema público sanitario”. Todos “vivimos unha tremenda proba de estrés”, apuntou, e “facemos o noso traballo o mellor que sabemos por un ben común que é a sanidade pública”.

Pola súa banda, García Rivera expresou tras recibir a distinción que no mes de marzo se viviron momentos “moi duros, de enorme desafío a nivel profesional”. Nese momento “sentimos medo, inseguridade e illamento”, pero unha vez “encarada” a situación chegou “o aprecio e a solidariedade de vos, da sociedade”. Rivera apuntou que “tomamos conciencia da necesidade de estar unidos e da responsabilidade conxunta para saír adiante”. A pandemia, dixo, “puxo de manifesto a necesidade de preservar a sanidade pública universal e de calidade”. Por último, agradeceu a “posta en valor que o Concello fai á sanidade pública e, por tanto, a todo o persoal que a conforma”. 

Sánchez Trigo lembrou que a pandemia “arrasou con todo, con nosas vidas e coa nosa forma de traballar”. Cada día “chegaban novas aportacións científicas e tivemos que aprender sobre a marcha. Nunca antes vivimos unha situación parecida. O mundo parou, pero nós non”. En medio da pandemia “atopamos”, dixo, “algo fundamental que xa existía, o noso excelente equipo, formado por persoas normais capaces de facer cousas excepcionais e afrontar calquera situación”. Rematou a súa intervención cun agradecemento expreso polo recoñecemento “ao noso labor”. 

Tras a última interpretación a cargo de Mosquera e Rivas, Héroes, de David Bowie, o conselleiro de Sanidade agradeceu ao Concello de Ferrol a súa invitación ao acto e encomiou o traballo desenvolvido polos profesionais da Área Sanitaria de Ferrol, que mostraron “a súa grandeza, entrega e compromiso persoal”. “Sodes”, dixo “un equipo excelente” e “gracias a vós o sistema sanitario galego funcionou” durante a pandemia. Sobre o futuro, Comesaña apuntou que o sistema sanitario “é clave para que o proceso de vacinación remate con éxito”.

Para rematar o acto pola festividade de San Xiao, Mato fixo referencia aos feitos sucedidos na noite de onte en Estados Unidos, “case impensable ata que se producen” e que “débennos levar a comprender que especialmente nos momentos difíciles é cando debemos manter unida a sociedade e confiar na fortaleza das nosas institucións”. A defensa das ideas propias, dixo, e o debate político “débense afastar da confrontación gratuíta e fundamentarse no respecto ás lexítimas diferenzas”. Sen esa premisa, concluíu, “a democracia non pode perdurar”. 

O alcalde agradeceu a presenza das corporacións de Lugo e Ferrol e dos representantes dos homenaxeados e mostrou o seu desexo de que o próximo ano “nos reunamos neste escenario cos amigos de Lugo e cos ferroláns máis destacados”. O acto pechou coa proxección dun vídeo musical elaborado por músicos de Ferrol dedicado aos colectivos que recibiron a distinción. 
 
 


Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar