venres, 08 de xaneiro de 2021
O Concello iniciará o luns os traballos para substituír o chan do parque infantil da praza do Inferniño
A concellería de Servizos e Obras, que dirixe Ana Lamas, tamén iniciará a próxima semana a renovación do solo e do xogo accesible da praza de Sevilla. A intervención en ambos recintos inclúe a retirada do chan amortecedor existente e a colocación dun novo continuo
O Concello de Ferrol vai acometer a próxima semana melloras nos parques infantís das prazas do Inferniño e de Sevilla, tal e como anunciou esta mañá a concelleira de Servizos e Obras, Ana Lamas. O luns, 11 de xaneiro, comezarán os traballos no barrio do Inferniño e a mediados de semana na praza de Sevilla.
A edil explicou que en ambos espazos substituirase o chan amortecedor existente por un
novo, tamén amortecedor, que cumprirá coas alturas de caída do xogo establecidas na
normativa e que será de caucho continuo, polo que se optimizará tanto o seu
mantemento como o seu resultado. O novo chan contará ademais con debuxos de
diferentes cores e formas co fin de facer máis atractivo o espazo.
No caso do parque infantil da praza de Sevilla, a concelleira indicou que tamén se
retirará o xogo inclusivo actual e substituirase por outro novo inclusivo e accesible de
dimensións e características similares. O noso obxectivo, explicou, “é ir mellorando e
adaptando os parques infantís de Ferrol”.
