Novas

sábado, 09 de xaneiro de 2021

O Concello proporciona aloxamento a todas as persoas sen teito que o requiren no primeiro dispositivo especial de protección polas baixas temperaturas

Participou no despregue un equipo de 12 efectivos da agrupación de voluntarios de Protección Civil, que na primeira noite do plan percorreu o municipio en busca de persoas que dormen na rúa para ofrecerlles acubillo, bebida quente, comida e mantas. Atendéronse a cinco persoas: unha foi trasladada a unha pensión, outra á casa dun familiar e as outras tres rexeitaron o aloxamento. Os voluntarios tamén se interesaron pola súa saúde, a súa situación familiar e proporcionáronlles un contacto ao que recorrer en caso de necesidade.


O Concello proporciona aloxamento a todas as persoas sen teito que o requiren no primeiro dispositivo especial de protección polas baixas temperaturas

O Concello de Ferrol activou onte o primeiro dispositivo especial de protección das persoas sen teito con motivo das baixas temperaturas desta fin de semana. As concellerías de Seguridade, que dirixe Germán Costoya, e de Benestar Social, da que é titular Eva Martínez Montero, coordinan un plan que comezou na noite de onte e que se manterá ata o luns co fin de ofrecer aloxamento e protección a todas as persoas sen fogar da cidade. 


A agrupación de voluntarios de Protección Civil de Ferrol activou para iso un equipo especial formado por 12 efectivos —entre o persoal dos tres vehículos do servizo e da ambulancia, o xefe da agrupación e o persoal da central telefónica— co fin de atender á media ducia de persoas que nun principio se estima dormen na rúa. Durante na xornada de onte, que comezou ás 22 horas ata preto das dúas da mañá, os voluntarios de Protección Civil percorreron as rúas do municipio en busca das persoas sen fogar para ofrecerlles acubillo, bebida quente (leite, café e caldo), comida e mantas. 

Atenderon a cinco: unha aceptou ser trasladada pasadas a media noite á habituación dunha pensión, proporcionada polo Concello, outra foi trasladada á casa dun familiar tras manifestar que a súa intención era chegar camiñando de noite e os outros tres rexeitaron o aloxamento ofrecido por Protección Civil. A todos eles ofrecéuselles bebida quente comida e mantas. Os efectivos voluntarios tamén se interesaron pola súa saúde, as súas últimas visitas ao médico e a súa situación familiar. Tamén se lles proporcionou un contacto ao que recorrer en caso de necesidade. 

A primeira xornada do dispositivo especial comezou xa pola tarde, coa provisión de mantas e a preparación da bebida quente e bocadillos nas instalacións de Protección Civil no Sánchez Aguilera.  

Aloxamento 
Hoxe sábado e mañá domingo continuará o dispositivo especial por mor das baixas temperaturas. O obxectivo, explican os edís de Seguridade e Benestar, é ofrecer a todas as persoas que dormen na rúa un aloxamento se eles queren. 
O Concello de Ferrol, a través da Mesa Técnica municipal sobre Persoas Sen Teito —integrada por diferentes entidades sociais da cidade— face un seguimento das persoas que dormen na rúa co fin de proporcionarlles recursos. “O Concello, xunto coas asociacións, que desenvolven un traballo vital para estas persoas, colabora de forma conxunta para abordar esta situación”, ao igual que “sucedeu durante o primeiro estado de alarma”, cando se habilitou un albergue provisional na Casa do Mar, explicou Martínez Montero.


Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar