Novas

luns, 11 de xaneiro de 2021

O sistema de videovixilancia do tráfico instalado nos vehículos da Policía Local comezará a funcionar o próximo luns

O lector de matrículas aporta información sobre a situación dun automóbil, como se carece de seguro ou foi roubado. Tamén se activarán as cámaras instaladas nas interseccións das rúas Terra e Sol e Rubalcava con Igrexa, que controlarán o acceso á zona peonil da praza de Armas


O novo sistema de vixilancia do tráfico que posibilitará á Policía Local mellorar o control a circulación en Ferrol comezará a funcionar o próximo luns, 18 de xaneiro. Logo de que os axentes que o van a manexar pasasen un período de formación os catro dispositivos xa foron probados nos coches patrulla para verificar o seu correcto funcionamento sobre o terreo. 


A Policía Local de Ferrol recibiu a finais de agosto os dispositivos que forman parte do novo sistema de videovixilancia. Está integrado por catro cámaras especiais, que se conectan a dúas tablets con rede de datos e dúas impresoras que se montan nos coches patrulla segundo as necesidades de cada servizo. Estes equipos facilitaranlles aos axentes o control da circulación e do cumprimento das normas, xa que son capaces de ler as matrículas sen lugar a erro aínda en movemento. 

Ademais de identificar infraccións como o estacionamento en dobre fila ou sobre beirarrúas e verificar o tempo de aparcamento de cada vehículo nas rúas, os aparatos permitirán realizar outro tipo de labores, como comprobar de maneira inmediata a situación administrativa de calquera vehículo. Por exemplo, se conta con seguro, se pesan sobre el precintos ou embargos ou se ten ao día a inspección técnica. Tamén alertará aos axentes cando detecte vehículos que consten como roubados ou dos que se sospeita que se empregan en actividades ilícitas, da mesma maneira que dos que sexan utilizados usualmente por condutores multirreincidentes ou delincuentes. 

Concienciación cidadá 
Para o concelleiro de Seguridade e Tráfico, Germán Costoya, a misión máis importante do sistema de videovixilancia do tráfico será a de “concienciar á cidadanía” de que as normas de tráfico deben ser respectadas, “para mellorar a fluidez da circulación e evitar prexuizos ao resto de usuarios das vías públicas, pero, por enriba de todo, para evitar situacións de risco e accidentes”. 

Cámaras para regular o acceso á Praza de Armas 
O próximo luns tamén entran en funcionamento as cámaras de vixilancia instaladas nas interseccións das rúas Sol e Terra e de Rubalcava con Igrexa para regular o tráfico polo espazo peonil da praza de Armas.

Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar