O Concello de Ferrol adxudicou no día de onte o proxecto por un importe de 34.706, 89 euros. As obras comezarán no prazo dun mes e pretenden dar servizo a un total de 25 vivendas repartidas nos tres edificios coa instalación dun novo colector na súa fachada, con puntos de vertido individualizados, que recollerá os seus vertidos e mellorará as condicións hixiénicosanitarias da zona. Deste modo tamén se evitará o paso dunha instalación de vertido baixo as edificacións situadas na estrada de Castela. 

A concelleira Lamas apuntou esta mañá que dita intervención é unha “demanda histórica” dos veciños da rúa Curros Enríquez. Para a concelleira de Obras e Servizos “era unha absoluta necesidade dar solución a esta situación” que repercute no día a día dos residentes na zona. A execución dos traballos “permitirá por tanto eliminar os focos de insalubridade na zona como consecuencia da configuración actual de vertido de augas residuais á rede xeral de saneamento municipal”, apuntou Lamas. 

O tramo de beirarrúa afectado polos traballos proxectados presenta na actualidade tres deseños distintos de beirarrúa, con diversos anchos. Co fin de harmonizar o entorno, Lamas anunciou que as obras contemplan tamén a execución dunha nova beirarrúa de dous metros de ancho fronte aos 1,2 da actual e acorde co entorno.