A concelleira de Benestar Social, Eva Martínez Montero, trasladou aos grupos da oposición durante a Comisión Informativa de Benestar Social, Igualdade, Muller, Xuventude e Patrimonio Histórico celebrada esta mañá que a iniciativa está dirixida a persoas maiores de 65 anos que “por mor da crise sanitaria que estamos a vivir non poden ter un completo e aconsellable envellecemento activo”.

O programa ‘De momento na casiña’ poñerase en marcha inicialmente cun grupo de 15 persoas, que serán seleccionadas a través das entidades veciñais da cidade tendo en conta a súa situación persoal dando prioridade a aquelas que vivan soas, que non teñan acceso ás novas tecnoloxías, que as súas familias vivan lonxe, que teñan medo de saír da casa ou non poidan por outras razóns ou que amosen preocupación pola súa saúde mental, entre outros criterios. O obxectivo é localizar aos veciños que máis o poidan necesitar posto que “a pandemia que estamos a vivir fainos a modificar as nosas costumes sociais ou persoais, máis aínda no caso dos nosos maiores”, explicou a concelleira. 

Os cerebros das persoas da terceira idade son “moi vulnerables e sensibles ao illamento, por iso estas persoas presentan perdas cognitivas despois do confinamento”, un dato do que fan “especial fincapé os distintos profesionais que traballan con maiores”, lembrou Martínez Montero. A isto súmase que “neste momento non son nada aconsellables as xuntanzas entre persoas para previr a propagación do virus, polo que consideramos que a estimulación cognitiva no fogar é a mellor opción”. Ademais de entregar material e explicar semanalmente os exercicios a desenvolver, todos adaptados ao nivel intelectual de cada un, o programa inclúe atención telefónica e un análise do impacto do plan nos hábitos de vida do beneficiario. 

En coordinación con Cáritas para reforzar o acompañamento a maiores Ademais da posta en marcha nas próximas semanas do programa ‘De momento na casiña’, o Concello vai dar un paso mais na mellora da atención e acompañamento aos maiores da cidade, polo que a concellería de Benestar Social está a traballar conxuntamente con Cáritas co fin de “sumar esforzos e unir sinerxias entre o seu programa de acompañamento e o noso co fin de optimizar recursos”. Nesta liña, a edil anunciou que a finais de mes terá lugar un curso de formación básica e outro de especialización en atención á terceira idade “aberto tamén ao voluntario de Cáritas e, por suposto, ao resto de entidades que desenvolva este servizo que desexe traballar en rede”. 

Pola súa banda, a concelleira de Igualdade, Muller e Xuventude, Cristina Prados, presentou aos grupos da oposición durante a comisión a proposta de declaración institucional co gallo do 8M para a presentación de achegas. Tamén deu conta da xornada telemática ‘Algoritmos para romper desigualdades’, que terá lugar o 11 de febreiro con motivo do Día Internacional da Muller e da Nena na Ciencia. Abrirán a sesión o alcalde, Ángel Mato, e Prados, e a continuación ofreceranse catro relatorios. O primeiro, ‘Empoderamento económico feminino, retrocedendo ou avanzando’, impartiralo Ana Cebreiro Gómez, doutora en Economía, responsable de Tributación Internacional no Banco Mundial e académica correspondente na Real Academia Galega de Ciencias. O segundo, ‘Estratexias STEM: o reto de motivar as mozas a estudar enxeñería ou ciencias’, correrá a cargo de María José Abad López, doutora en Física, titular de universidade no departamento de Física e Ciencias da Terra e subdirectora da Oficina para a Igualdade de Xénero da UDC.

Elena Vázquez Cendón, doutora en Ciencias Matemáticas, profesora de Matemática Aplicada e decana da Facultade de Matemáticas da Universidade de Santiago de Compostela (USC) encargarase do terceiro relatorio titulado ‘Existen mulleres nas matemáticas? Si, podemos demostralo’. Por último, o relatorio ‘De Ferrol ao Congo: retos e desafíos’, impartiralo Rebeca Atencia Fernández, doutora en MedicinaFisioloxía e directora do Instituto Jane Goodall Congo e do Centro de Rehabilitación de Chimpancés do IJG en Tchimpounga, Congo. O prazo de inscrición comeza mañá mércores, 3 de xaneiro, a través da web municipal https://www.ferrol.gal/Sede/MulleresNaCiencia e estará aberto ata o mesmo día da xornada.