Novas

venres, 05 de febreiro de 2021

O Concello pide á Xunta un protocolo para realizar probas PCR para os ingresos na Casa da Acollida

A concelleira de Muller, Cristina Prados, motivou a necesidade de dito procedemento para protexer tanto ás usuarias como aos empregados


O Concello de Ferrol vén de solicitar á Secretaría Xeral de Igualdade da Xunta un protocolo de realización de probas PCR ás persoas de novo ingreso na Casa de Acollida de Ferrol. A concelleira de Muller e Igualdade, Cristina Prados, explicou esta mañá que dita situación supón un risco para as usuarias, as súas familias e as traballadoras do centro unha nova alta sen a oportuna PCR. 


Ante a situación de pandemia actual, e dado que os servizos de atención a mulleres vítimas de violencia de xénero son considerados servizos esenciais, lembrou Prados, “consideramos que en aras de poder continuar ofrecendo o servizo prestado, atendendo a criterios de calidade e eficiencia así como de prevención, é preciso valorar alternativas urxentes que garantan a seguridade das usuarias dos centros, así como das traballadoras”. 

As canles de derivación a través da Rede Galega de Acollemento “non foron actualizadas para atender á necesidade de verificar a posibilidade de contaxio por covid no caso de solicitudes de ingreso”, explicou, entendendo que resulta insuficiente a declaración xurada de ausencia de enfermidades infecto contaxiosas pola posibilidade de infección sen sintomatoloxía, lembrou a concelleira. 

Por iso a edil considera “imprescindible” que se tomen as medidas oportunas para “garantir a seguridade das mulleres, menores e traballadoras dos centros de acollida e que os ingresos se realicen de xeito coordinado con Sanidade garantindo o acceso cunha PCR negativa”, polo que o Concello solicita á Secretaría Xeral de Igualdade que “xestione o máis pronto posible o acceso ás PCR para facilitar coa maior eficacia e eficiencia os ingresos na Rede Galega de Acollemento”. 






Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar