Novas

venres, 05 de febreiro de 2021

O prazo para anotarse na Escola municipal de Familias remata o día 10

Comezará o día 15 de febreiro e levarase a cabo en coordinación coas asociacións Ex-alcohólicos e Asfedro. A concelleira de Benestar Social, Eva Martínez Montero, lembrou que as follas de inscrición están dispoñibles nos centros escolares, onde se poden entregar. Os pais tamén se poden anotar a través da Asfedro no correo electrónico prevencionasfedro@gmail.com


O prazo para anotarse na Escola municipal de Familias remata o día 10 de febreiro. O programa desenvolverase no centro municipal de Servizos Sociais (rúa Sánchez Barcáiztegui, 35) e inclúe seis sesión: 15 e 22 de febreiro e 1, 8, 15 e 22 de marzo, de 17 a 18.30 horas. As follas de inscrición están dispoñibles nos centros escolares, onde se poden entregar antes do 10 de febreiro. Os pais tamén poden anotarse no mesmo prazo no correo electrónico prevencionasfedro@gmail.com. A formación levarase a cabo segundo os protocolos covid establecidos nese momento polas autoridades sanitarias. 


A nova Escola municipal de Familias estará aberta a pais e nais dos centros públicos e concertados da cidade co fin de abordar as adiccións en catro bloques: as drogas legais, ilegais, as novas tecnoloxías —incluíndo o acceso á pornografía— e, por último, as adiccións ao xogo e apostas. A formación sobre os dos primeiros correrá a cargo dos expertos da asociación Ex-alcohólicos e as outras dous impartiranse polos de Asfedro (Asociación Ferrolana de Drogodependencias). 

Trátase dunha iniciativa que busca proporcionar ás familias as ferramentas necesarias para “axudalos a afrontar posibles dificultades no núcleo familiar e sensibilizar dos riscos que entrañan as adiccións”, explicou a edil de Benestar, Eva Martínez Montero. A escola pretende mellorar as habilidades educativas, de xestión e de comunicación familiar e reforzar as súas competencias relacionadas coa educación dos seus fillos. Para iso crearase un espazo de “reflexión e de intercambio” de experiencias no que se abordarán asuntos como a comunicación familiar e os estilos educativos, as normas e límites, a adolescencia, as drogas e as adicción en xeral. 

A futura Escola municipal de Familias forma parte das accións impulsadas polo Grupo de Traballo de Infancia, Familia e Adolescencia de Ferrol, posto en marcha polo Concello de Ferrol e do que forman parte as entidades Aspaneps, Ex-alcohólicos, Acción Familiar, Teima Down, Secretariado Gitano, Dignidad, Proinfancia, Asfedro e Ingada. A edil manifestou a seu agradecemento ás dúas entidades coas que se desenvolverá a iniciativa posto que “levan anos acreditando a súa solvencia tanto na atención aos usuarios como na formación, información e prevención das adiccións”.

Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar