Novas

martes, 09 de febreiro de 2021

O Concello celebrará o xoves o Día Internacional da Muller e da Nena na Ciencia cunha xornada telemática con doutoras en Economía, Física, Matemáticas e Medicina

O alcalde, Ángel Mato, e a edil de Igualdade, Cristina Prados, abrirán a sesión, que terá lugar o 11 de febreiro ás 16 horas. Sigue aberto ata o mesmo día o prazo de inscrición a través da web municipal ferrol.gal/Sede/MulleresNaCiencia


O Concello celebrará o xoves o Día Internacional da Muller e da Nena na Ciencia cunha xornada telemática con doutoras en Economía, Física, Matemáticas e Medicina

O Concello de Ferrol celebrará pasado mañá, xoves 11 de febreiro, o Día Internacional da Muller e da Nena na Ciencia cunha xornada telemática titulada ‘Algoritmos para romper desigualdades’. O prazo de inscrición segue aberto ata o día da sesión na web municipal https://www.ferrol.gal/Sede/MulleresNaCiencia. 


Abrirán a sesión ás 16 horas o alcalde, Ángel Mato, e a concelleira de Muller e Igualdade, Cristina Prados, e a continuación ofreceranse catro relatorios. O primeiro, ‘Empoderamento económico feminino, retrocedendo ou avanzando’, impartiralo Ana Cebreiro Gómez, doutora en Economía, responsable de Tributación Internacional no Banco Mundial e académica correspondente na Real Academia Galega de Ciencias. O segundo, ‘Estratexias STEM: o reto de motivar as mozas a estudar enxeñería ou ciencias’, correrá a cargo de María José Abad López, doutora en Física, titular de universidade no departamento de Física e Ciencias da Terra e subdirectora da Oficina para a Igualdade de Xénero da UDC. 

Elena Vázquez Cendón, doutora en Ciencias Matemáticas, profesora de Matemática Aplicada e decana da Facultade de Matemáticas da Universidade de Santiago de Compostela (USC) encargarase do terceiro relatorio, titulado ‘Existen mulleres nas matemáticas? Si, podemos demostralo’.

Por último, o relatorio ‘De Ferrol ao Congo: retos e desafíos’, impartiralo Rebeca Atencia Fernández, doutora en Medicina-Fisioloxía e directora do Instituto Jane Goodall Congo e do Centro de Rehabilitación de Chimpancés do IJG en Tchimpounga, Congo. 





Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar