A edil deu conta esta mañá na comisión informativa de Medio Ambiente, Urbanismo, Servizos, Obras, Seguridade e Contratación dos avances na execución do programa, que se divide en tres actuacións. A primeira, xa en marcha, consiste en delimitar e prohibir o tránsito da área crítica de nidificación do ave na praia de San Xurxo. De feito, dito areal, xunto ao de Esmelle e A Frouxeira, en Valdoviño, alberga actualmente o núcleo da construción de niños da ave máis setentrional de Galicia e do litoral atlántico ibérico. Delimitarase durante cinco anos un perímetro estimado de 1.200 metros lineais da zona de nidificación e do cordón dunar na praia de San Xurxo, para o que se empregan rolos de madeira unidos por unha corda, un tipo de valado sinxelo e desmontable moi utilizado para evitar o paso aos sistemas dunares. Con esta medida preténdese mellorar o recrutamento local como ferramenta para incrementar as posibilidades de reasentamento na praia, polo que se prohibe o tránsito de persoas e animais domésticos durante todo o ciclo anual. 

A segunda actuación, tamén en execución, consiste na colocación de paneis informativos indicando o código de conduta e de xeito específico ás prohibicións de paso pola zona protexida. 

Por último, a terceira liña de traballo contempla a posta en marcha dunha campaña de sensibilización que inclúe á comunidade educativa. Para elo, o Concello contará coa colaboración da Sociedade Galega de Historia Natural (SGHN), que promoverá unha charla ao inicio das campañas de nidificación, e da Aula de Ecoloxía Urbana, no Cantón de Molíns, que desenvolverá actividades que contribuirán á divulgación entre escolares e público en xeral e que poderán solicitar colexios e entidades.