Os novos circuítos ten como obxectivo combater o sedentarismo entre a poboación ferrolá, para o que se habilitarán percorridos sinxelos e alcanzables para toda a poboación tanto no espazo rural como urbano para camiñar durante ao menos unha hora. 

O edil de Seguridade e Sanidade, Germán Costoya, mantivo esta semana unha reunión coa presidenta, vicepresidenta e psicóloga da xunta local de Ferrol da AECC, Isabel Estevan, Mabel Sanesteban e Rosalía Fernández respectivamente, para ultimar o convenio que firmarán nas próximas datas e que permitirá abordar de forma conxunta a iniciativa. O edil explicou que o Concello pretende habilitar un espazo de actividade física no municipio que permita “adquirir o hábito de facer exercicio a aquelas persoas que non teñen esta rutina”.

Costoya engadiu que o proxecto vai máis alá do acondicionamento dos percorridos polo municipio. A actividade física levarase a cabo en grupos dirixidos por un monitor e desde a entidade farase un seguimento do impacto desta nova rutina na saúde dos participantes. O fin, explican desde a AECC local, é ir aumentando a frecuencia e, por conseguinte, os beneficios no estado físico. Os interesados en participar xa poden inscribirse no número de teléfono de balde de Infocáncer (900 100 036) ou chamando á sede en Ferrol (981 37 00 03). Tamén de forma presencial no local da entidade, no número 5 da rúa Terra. A asociación fará unha avaliación inicial do estado físico dos inscritos no proxecto ‘Rutas Saudables’. 

O edil de Sanidade explicou que o sedentarismo é un dos factores de risco máis importantes para a saúde. É por iso que o proxecto entre o Concello e a AECC cumprirá parte dos obxectivos marcados pola Comisión para a Prevención de Enfermidades Cardiovasculares de Galicia, a primeira na comunidade autónoma e constituída polo Concello o pasado mes de setembro. 

No novo órgano están representados, ademais do goberno local, co edil Costoya, e os grupos municipais da oposición, o departamento de Cardioloxía do CHUF, a través da súa xefa de servizo, Raquel Marzoa; a Asociación de Amigos do Corazón (Amicor), con Carlos Piñeiro; e os servizos municipais de emerxencias —Policía Local, Bombeiros e Protección Civil—. Tal e como explicou o concelleiro, o obxectivo do novo organismo, o primeiro destas características en Galicia, é “concienciar á poboación sobre as enfermidades cardiovasculares —principal causa de morte no mundo—, os factores de risco e tamén incidir na importancia que ten coidar do noso corazón”. 

Na actualidade o novo órgano está a traballar en novas propostas “de cara a mellorar a calidade de vida dos nosos veciños” que poñeranse enriba da mesa no próximo encontro que celebrará nas próximas datas.