Novas

venres, 12 de febreiro de 2021

Concello e Xunta fixan para marzo a primeira reunión técnica sobre a candidatura de Ferrol a patrimonio mundial

O alcalde, Ángel Mato, e a concelleira de Patrimonio Histórico, Eva Martínez Montero, reuníronse esta mañá co conselleiro de Cultura, Román Rodríguez, e a directora xeral de Patrimonio Cultural, María del Carmen Martínez Insua, para concretar a colaboración entre ambas Administracións


Concello e Xunta fixan para marzo a primeira reunión técnica sobre a candidatura de Ferrol a patrimonio mundial

O Concello e a Xunta de Galicia acordaron esta mañá os próximos pasos que van dar respecto da candidatura de Ferrol a patrimonio mundial. A reunión telemática na que participaron o alcalde, Ángel Mato; o conselleiro de Cultura, Román Rodríguez; a concelleira de Patrimonio Histórico, Eva Martínez Montero, e a directora xeral de Patrimonio Cultural, María del Carmen Martínez Insua, serviu, ademais de para de estreitar a colaboración entre ambas Administracións, para programar a primeira reunión de carácter técnico na que se vai poñer en común a revisión do expediente. Nela está previsto que participen, ademais da edil e da directora xeral, o persoal tanto da Administración local coma da autonómica que traballa directamente na iniciativa. 


Mato agradeceulle ao conselleiro “o seu compromiso con este proxecto”, tal e como o responsable autonómico xa mostrara na súa primeira visita oficial ao Concello, hai xusto un ano, e reiterou hoxe. Lembrou, ademais, a coincidencia de puntos de vista entre as dúas Administracións “para levar cara adiante esta candidatura”. Por outra banda, o rexedor precisou que o Ministerio de Defensa debe ter tamén un papel destacado no proxecto, como propietario de moitos dos bens que forman parte do expediente, e confiou en que o traballo conxunto dea como resultado que a candidatura de Ferrol se incorpore “o máis axiña posible” aos proxectos que desde España se poidan trasladar á Unesco. 

Para a concelleira, o feito de ter concretado a reunión técnica constitúe “un avance moi importante”, que dá continuidade “ao marco de colaboración que se estableceu a principio do mandato” entre o Concello e a Xunta. Martínez Montero confiou tamén en que se logre artellar unha candidatura “forte e consensuada por todas as partes implicadas”, xa que vai ser “unha candidatura de Galicia, pero tamén do Estado”.









Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar