Novas

mércores, 17 de febreiro de 2021

Ángel Mato: “Hai unha necesidade imperiosa de tomar medidas a curto e a longo prazo para garantir a competitividade dos estaleiros”

O alcalde de Ferrol, a alcaldesa de Narón, o rexedor de Fene e o primeiro tenente de alcalde de Mugardos acompañaron aos representantes dos traballadores de Navantia e da industria auxiliar durante as reunións cos grupos parlamentarios. Durante a primeira xuntanza, os deputados e os senadores socialistas galegos aceptaron visitar as instalacións de Ferrol e Fene, tal e como lles solicitaron os comités de empresa, para comprobar sobre o terreo a situación “crítica”


Ángel Mato: “Hai unha necesidade imperiosa de tomar medidas a curto e a longo prazo para garantir a competitividade dos estaleiros”

O alcalde de Ferrol, Ángel Mato, reiterou esta tarde en Madrid, tras a reunión dos representantes dos traballadores de Navantia con deputados e senadores socialistas, a “necesidade imperiosa de tomar medidas a curto e a longo prazo para garantir a competitividade dos estaleiros”. Foi dentro da rolda de contactos do comité de empresa cos grupos parlamentarios, na que se incluían tamén xuntanzas co popular, co deputado do BNG e co grupo de Podemos. Nos encontros participaron, xunto co rexedor ferrolán, a alcaldesa de Narón, Marián Ferreiro; o de Fene, Juventino Trigo, e o tenente de alcalde de Mugardos, José Miguel Mahía. 


A representación do Grupo Parlamentario Socialista estivo encabezada polo seu voceiro, Rafael Simancas, co que acudiron os deputados Diego Taibo, Montserrat García, Guillermo Meijón e Adolfo Pérez Abellá, e os senadores Xaquín Fernández Leiceaga, Antonio Vázquez Lorenzo e César Mogo. 

Por parte dos traballadores, asistiron os presidentes dos comités de empresa de Navantia Ferrol, Emilio García Juanatey, e de Fene, Adela López Rey. Estiveron acompañados por Miguel Pol Leyva (CC.OO), Marcelino Amado Díaz (CIG), Xaquín García Sinde (CGT) e Juan Carlos Díaz Rico (MAS). En representación do persoal da industria auxiliar estiveron presentes Víctor Matesanz Fraguela e Roberto López Suárez.  

“O dique Cuberto forma parte do plan de competitividade” 
O obxectivo era trasladar a situación “crítica”, tal como a cualificou García Juanatey, non só de Navantia, senón da industria da comarca. E o xeito de revertela, afirmou, pasa, especialmente, por garantir carga de traballo a curto prazo e pola construción dun dique cuberto. En similares termos se expresou Ángel Mato, quen lembrou que a construción desa infraestrutura “forma parte do plan de competitividade” deseñado para converter a factoría ferrolá nun estaleiro 4.0. 

Non foi a única necesidade que puxo de manifesto o rexedor. Incluíu tamén entre os obxectivos para as plantas da empresa pública a potenciación da área de turbinas de cara ao desenvolvemento de proxectos de eólica mariña e fixo un chamamento tanto á Xunta de Galicia como ao Goberno de España para que as costas galegas poidan acoller ese gran proxecto que acaba de anunciar a compañía Iberdrola. 

Toda esta problemática trasladóuselles “de primeira man” aos parlamentarios socialistas, que aceptaron a invitación dos traballadores para visitar os estaleiros da ría, co obxectivo de comprobar sobre o terreo a situación pola que pasa o sector naval neste momento. Tamén se comprometeron a facerlle chegar ao Goberno as reivindicacións dos representantes laborais, para que as teña en consideración. 

García Juanatey celebrou a coincidencia da análise expresada polos deputados e senadores respecto dos problemas que se lles transmitiron. “En xeral, concordan coas nosas reivindicacións”, dixo. Pola súa banda, López Rey destacou o papel de Navantia Fene na eólica mariña e reclamou apoio por parte do Goberno e da empresa para que o estaleiro fenés “teña un futuro longo”.







Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar