Novas

venres, 19 de febreiro de 2021

O Concello dotará as instalacións deportivas con Plans de Autoproteción

A Administración local vén de adxudicar a elaboración de PAP para o complexo da Malata, FIMO, os pavillóns de Esteiro e Ensanche, o polideportivo Gómez Noia, os campos de fútbol da Gándara, Aneiros e Caranza, os pañois de deportes náuticos da antiga nave da Cabana e a Casa do Deporte. O concelleiro de Deportes, Antonio Golpe, apuntou que aínda que a maioría das instalacións deportivas da cidade non o requiren segundo a lei, o Concello vai implantalos porque considera a seguridade unha “absoluta prioridade”


O Concello dotará as instalacións deportivas con Plans de Autoproteción

O Concello de Ferrol vén de contratar a elaboración de Plans de Autoproteción (PAP) para o complexo deportivo da Malata —pavillón e pistas de atletismo, tenis e padel—, as instalacións deportivas de FIMO, os pavillóns de Esteiro e Ensanche, o polideportivo Gómez Noia, os campos de fútbol da Gándara, Aneiros e Caranza, os pañois de deportes náuticos da antiga nave da Cabana e a Casa do Deporte. 


O concelleiro de Deportes, Antonio Golpe, indicou que aínda que a maioría das instalacións deportivas da cidade non requiren un PAP segundo a lei, “o Concello vai implantalos porque considera a seguridade unha absoluta prioridade”. 

O edil explicou que os novos documentos incluirán protocolos a seguir en caso de que se produza algunha emerxencia nos espazos deportivos, procedementos na loita contra incendios e en evacuacións, primeiros auxilios e a sinalización dos novos elementos motivados polos PAP. A implantación dos plans contempla tamén métodos para informar do seu contido aos usuarios e a formación do persoal implicado. 

Golpe anunciou que unha vez rematada a súa redacción, que ten un prazo de execución de seis meses, realizarase un simulacro en cada unha das instalacións nas que se aplicarán os novos PAP.

Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar