Novas

sábado, 20 de febreiro de 2021

O Concello repara os aseos dos mercados municipais da Magdalena e Recimil

Os traballos inclúen o acondicionamento de cisternas, a reposición de azulexos caídos e a substitución das portas danadas. O concelleiro de Mercados e Consumo, Germán Costoya, apuntou que a intervención forma parte do plan do goberno local de “apoiar e defender” o comercio local e de proximidade


O Concello de Ferrol está a proceder coas obras de acondicionamento e reparación dos aseos dos mercados municipais da Magdalena e Recimil. Inclúen, tal e como lembrou o concelleiro de Mercados e Consumo, Germán Costoya, a reparación de cisternas, a reposición de azulexos caídos, a substitución das portas danadas e o pintado e saneamento xeral dos espazos. O proxecto adxudicouse por un importe de 17.157,8 euros e contempla intervir tanto nos aseos interiores como nos exteriores do mercado da Magdalena, nos mixtos do de Recimil e nos localizados no soto de dito edificio. 


Os traballos que se están a levar a cabo forman parte do plan do Concello de Ferrol para “acondicionar e arrombar os nosos mercados municipais”, explicou o edil. Desde o goberno local “apostamos por apoiar e defender o comercio local, polo que estamos a poñer todos os nosos medios para contribuír a que os nosos mercados sexan máis atractivos para os veciños da cidade e promover deste modo o comercio de proximidade”, manifestou o concelleiro. 

Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar