Novas

martes, 23 de febreiro de 2021

O Concello equipa o parque canino do Bertón con elementos de xogo da modalidade agility

O edil de Benestar Animal, Germán Costoya, visitou esta mañá o recinto, que xa conta cun salto de lonxitude, un obstáculo e roda de salto, unha pasarela, un túnel, un valado, unha estrutura de slálom e un balancín. O concelleiro explicou que a intervención forma parte do plan do goberno local de habilitar na cidade “recintos axeitados que permitan acudir cos cans para que gocen dun espazo creado especialmente para eles”


O Concello equipa o parque canino do Bertón con elementos de xogo da modalidade agility

O Concello de Ferrol remata hoxe a instalación do novo mobiliario para equipar o parque canino do barrio do Bertón. O concelleiro de Benestar Animal, Germán Costoya, visitou esta mañá o recinto e explicou que o que se pretende é equipar o espazo con elementos que permitan adestrar en exercicios das probas de agility, unha modalidade na que o can supera unha serie de obstáculos para avaliar a súa axilidade, velocidade e destreza no salto. 


Durante esta mesma mañá estivéronse colocando no parque canino un salto de lonxitude, un obstáculo e roda de salto, unha pasarela, un túnel, un valado, unha estrutura de slálom e un balancín. O recinto conta tamén cun cartel informativo que indica as normas básicas de uso e seguridade xunto cun plano explicativo. As instalacións ocupan unha superficie de 450 metros cadrados e poderán ser utilizadas a partir do xoves, 25 de febreiro.

Para todo tipo de cans 
Os elementos que se acaban de subministrar son aptos para calquera tipo de can, con independencia do seu tamaño, explicou Costoya, e os materiais son resistentes á intemperie. A instalación dos novos elementos, dixo, forma parte do plan do Concello dirixido a “habilitar recintos axeitados que permitan acudir cos cans para que gocen dun espazo creado especialmente para eles”. É intención do goberno local “ir mellorando o estado dos parques caninos da cidade”, incluíndo os peches perimétricos e novo mobiliario, tamén o destinado para os propietarios dos animais, para facer máis agradable o uso destas superficies. 

Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar