Novas

xoves, 08 de abril de 2021

O Concello premia a loita contra a violencia de xénero a través da curtametraxe

A concelleira de Muller e Igualdade, Cristina Prados, deu conta esta mañá en comisión informativa dos premiados do I Concurso de Curtametraxes ‘Curta coa violencia de xénero’, organizado polo Concello. O obxectivo do certame municipal é “contribuír á erradicación da violencia de xénero” na sociedade a través dunha “ferramenta formativa e divulgativa”


A concelleira de Muller e Igualdade, Cristina Prados, deu conta esta mañá aos grupos da oposición na comisión ordinaria de Benestar Social, Igualdade, Muller, Xuventude e Patrimonio Histórico dos premiados na primeira edición do concurso de curtametraxes ‘Curta coa violencia de xénero’, celebrado en 2020 con motivo das actividades programadas polo Concello de Ferrol polo 25N ‘Día Internacional da Eliminación da Violencia contra a Muller. O obxectivo, explicou Prados, é “contribuír á erradicación da violencia de xénero” na sociedade a través dunha “ferramenta formativa e divulgativa”. 


O primeiro premio, dotado con 600 euros, foi para o filme ‘Escoita as sinais e rompe coa violencia’, co pseudónimo Café Müller, presentado por Cristina Silvera Piñeiro. O segundo, de 400 euros, recaeu na obra ‘Equi-s’, co pseudónimo A por todas, presentada por Diana Aradas Blanco en representación dun grupo de alumnos do centro escolar IES Moncho Valcarce (As Pontes). Por último, o terceiro premio, dotado con 200 euros, outorgouse ao curtametraxe ‘016’, presentado baixo o pseudónimo Mister e presentado por Kevin Sixto Díaz. 

Prados destacou esta mañá a “excelente calidade” dos traballos propostos, especialmente do que obtivo o primeiro premio, e resaltou “a claridade da mensaxe que trasladan —a tolerancia cero coa violencia de xénero— e o enfoque que utilizan para para transmitir esperanza e forza”. Neste senso lembrou que “o compromiso deste equipo de goberno na loita contra esta lacra é infranqueable”. 

Unha nova edición para este ano
A concelleira de Muller e Igualdade anunciou esta mañá que o seu departamento vai convocar este ano unha nova edición —a segunda— do concurso municipal de curtametraxes ‘Curta coa violencia de xénero’ coincidindo tamén cos actos con motivo da celebración do 25N.

Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar