Novas

xoves, 02 de xuño de 2022

O Concello celebrará o mércores día 8 unha sesión informativa aberta á cidadanía para iniciar unha folla de ruta que mellore a práctica deportiva da poboación de Ferrol

O concelleiro de Deportes, Antonio Golpe, presidirá a xornada no centro cultural Torrente Ballester a partir das 19 horas. Contarase coa presencia e participación do consultor especialista en desenvolvemento das cidades, economía e deporte, Juan Manuel Murúa


O Concello celebrará o mércores día 8 unha sesión informativa aberta á cidadanía para iniciar unha folla de ruta que mellore a práctica deportiva da poboación de Ferrol

 O Concello de Ferrol vai celebrar o próximo mércores, 8 de xuño, a sesión informativa ‘Caracterización da práctica de exercicio físico e deporte polos habitantes da cidade de Ferrol’ que terá lugar de 19 a 20.30 horas na capela do centro cultural Torrente Ballester. Trátase dun evento aberto a todas as persoas interesadas en coñecer como vai desenvolverse esta folla de ruta para mellorar a práctica deportiva entre a poboación de Ferrol, especialmente representantes das entidades deportivas da cidade. Poden realizarse xa as inscricións no enlace https://bit.ly/3GHkbg4


A xornada, conducida por Cristina Muñiz como coordinadora da área de Deporte no Concello de Ferrol, estará presidida por Antonio Golpe, concelleiro de Deportes, que contextualizará e explicará a necesidade da posta en marcha deste proxecto. Ademais contarase coa participación de Juan Manuel Murúa, consultor, investigador e formador especializado en cidade, economía e deporte, que ofrecerá unha exposición enmarcada no deporte e na construción de cidades activas. Finalmente, Jacobo Suárez, experto en deporte, explicará como se levará a cabo este proceso de caracterización a través da participación cidadá, informando sobre os seus obxectivos e pasos a dar na súa elaboración. A xornada rematará cunha quenda de participacións libres. 

Despois desta sesión informativa comezarase a desenvolver o proceso de caracterización da práctica de exercicio no municipio, abrindo canais de comunicación e participación para que todas as persoas interesadas poidan achegar as súas suxestións ao mesmo. Para máis información sobre o proceso pódese contactar coas persoas responsables a través do correo electrónico plandeporte@ferrol.es.

Importancia da caracterización da práctica deportiva en Ferrol 
O deporte “ocupa un espazo transversal na vida das persoas” nas cidades, explicou o edil, polo que “debe ser tido en conta no desenvolvemento integral do territorio, tanto dende o eido do benestar e da saúde, da calidade de vida e do atractivo turístico, como a nivel de oportunidades de emprego ou ordenación de espazos e modelo urbano”. A incorporación do deporte á rutina das persoas é un “elemento principal para acadar unha vida mais activa, con maior saúde e autonomía persoal, gozando dun maior benestar e calidade de vida, desde a infancia ata a vellez”, apuntou Golpe. Ademais, “axuda a previr e tratar enfermidades non transmisibles como cardiopatías, accidentes cerebrovasculares, diabetes e cancro de mama e de colon, e tamén incide na prevención da hipertensión e obesidade, así como na mellora da saúde mental”. O deporte é tamén “unha das mellores ferramentas socializadoras nas diferentes etapas da vida das persoas”. Por esta razón, o Concello de Ferrol elabora a caracterización da práctica de exercicio físico e deporte na cidade, peza fundamental da folla de ruta que terá a finalidade de impulsar o acceso universal á práctica do deporte como forma de promover un estilo de vida saudable para a poboación de Ferrol. 

Este proxecto de futuro “será sólido e consistente se se fai a través dun proceso participativo”, indicou o concelleiro, polo que “é imprescindible contar coa colaboración da cidadanía, tanto da poboación xeral como de colectivos ou entidades específicas do mundo do deporte local”. 

Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar