Web Municipal do Concello de Ferrol

Inicio Concello De actualidade Novas

Comparte esta páxina

xoves, 02 de xuño de 2022

A concelleira de Patrimonio Histórico reclámalle á Xunta a conservación dos restos arqueolóxicos da rúa do Castro dun xeito que sexan visitables no futuro

Eva Martínez Montero considera que o IGVS debe atender a recomendación dos técnicos de escavar toda a parte posterior do soar onde se fixeron as catas e conservar o que os primeiros indicios apuntan a que é un tramo da muralla medieval da cidade, de xeito que no futuro poida ser visitado

A concelleira Eva Martínez Montero trasladou esta mañá á Comisión Informativa de Benestar Social, Igualdade, Muller, Xuventude e Patrimonio Histórico a súa intención de reclamarlle á Xunta que conserve os restos arqueolóxicos aparecidos nun solar da rúa do Castro onde o IGVS proxecta levantar un edificio de vivendas. “A Consellería de Vivenda di hoxe na prensa que Patrimonio terá que valorar a excavación en profundidade que propón o informe arqueolóxico encargado polo IGVS, pero dende o Concello non contemplamos outra opción que a de conservar e poñer en valor a construción atopada nas catas”, explicou a edil tras a reunión, e incidiu en que, á vista dese documento, “parece que cada vez toma máis corpo a teoría de que a construción atopada polos arqueólogos é parte da muralla medieval da cidade”.

Para Martínez Montero, a simple posibilidade de que se trate dunha construción da que só se tiña noticia por documentos “debería abondar para que non se contemplara outra opción de poñer os restos en valor e comezar a planificar unha intervención axeitada para que puideran ser visitados no futuro”.

A concelleira xa se manifestara hai arredor dun mes, cando se fixo pública a aparición dun fragmento de muro nos números 22 e 24 da rúa Castro, a favor de “ampliar a pequena escavación que se realizou ata o momento, co fin de sacar á luz o máximo posible”. Entre as varias prospeccións arqueolóxicas que se realizaron na parcela, hai dúas que se atopan na parte posterior, nunha zona que no futuro albergará o patio traseiro do edificio. Nesas dúas catas, de arredor de dous por dous metros de área, é onde se sitúa o muro, entre outros elementos construtivos de menor antigüidade. “O propio informe encargado pola Consellería remarca o interese de escavar o predio antes da súa destrución, pero á marxe do que se poida decidir para a zona do soar onde se vai edificar, o que parece claro é que o espazo a priori de máis importancia debe protexerse, máis incluso se se ten en conta que se corresponde cunha zona na que non se vai construír”, argumentou a concelleira de Patrimonio Histórico, que incidiu tamén en que “nas últimas semanas diversos expertos na historia de Ferrol xa se teñen manifestado no mesmo sentido”.