martes, 07 de xuño de 2022
O Concello publica as bases que regulan a subvención de actividades de reactivación e promoción económica de Ferrol para 2022, que suman 135.000 euros para entidades da cidade
Pode consultarse toda a información no Taboleiro de Anuncios do Concello, no enlace https://cutt.ly/CJAKoXy. O prazo para presentar solicitudes abrirá unha vez se publique no BOP o extracto da convocatoria, nos próximos días. Está dirixida aos sectores do comercio, hostalería e mercados e asociacións empresariais
O Concello de Ferrol vén de publicar hoxe mesmo no Boletín Oficial da Provincia (BOP) as bases reguladoras específicas para a subvención de actividades de reactivación e promoción económica do Concello de Ferrol para o ano 2022. Pode consultarse toda a información no Taboleiro de Anuncios do Concello, no enlace https://cutt.ly/CJAKoXy.
O obxectivo é contribuír á dinamización da cidade e da economía local a través
de actividades e iniciativas dirixidas á reactivación e promoción económica dos sectores
do comercio, hostalería e mercados.
A subvención suma unha cantidade total de 135.000 euros. O importe máximo por
entidade é de 15.000 euros e pode solicitarse ata o 80% do orzamento de gastos
subvencionables.
Ofrécense dúas liñas de axudas. A primeira para actividades de dinamización da
oferta comercial, hostaleira e dos mercados destinadas á promoción do comercio local fronte ás grandes superficies, á recuperación do sector hostaleiro así como de apoio á
revitalización dos mercados municipais como referente do comercio de proximidade.
Pola súa banda, a segunda liña está dirixida a iniciativas para o fomento do
emprendemento na cidade de Ferrol.
Polo tanto, poderán concorrer a esta convocatoria todas aquelas asociacións, sen
ánimo de lucro, relacionadas co comercio, coa hostalería, cos mercados de Ferrol e coas
asociacións empresariais con ámbito de actuación no Concello de Ferrol que cumpran
os requisitos da convocatoria.
Tras a publicación hoxe das bases, o prazo para presentar as solicitudes abrirá ao
día seguinte ao da publicación do extracto da convocatoria no BOP, que se prevé para
os próximos días.
