Novas

xoves, 09 de xuño de 2022

Ángel Mato destaca que en só tres anos o seu goberno logrou un volume de licitación superior ao de anteriores mandatos completos

O alcalde enumerou que no 2011-2015 a cifra foi de 26,6 millóns, mentres que no 2015-2019 ascendeu a 14,6, e agora, cando aínda falta un ano para completar o ciclo, xa suma 28,7 millóns, aos que se sumarán en breve 4,1 que están en trámite. “Este goberno local que algún partido da oposición cualifica de ‘desbordado’ ou de ‘paralizado’ adxudicou 2,4 millóns de euros máis que un goberno de 13 e en menos tempo”, afirmou o rexedor nas “Conversas no Parador” do Club de Prensa


Ángel Mato destaca que en só tres anos o seu goberno logrou un volume de licitación superior ao de anteriores mandatos completos

O alcalde, Ángel Mato, participou esta mañá no ciclo “Conversas no Parador”, que organiza o Club de Prensa de Ferrol. A petición da presidenta da entidade, Julia Díaz, que presentou o acto, o rexedor fixo un balance dos tres anos de mandato. “Cando oio a crítica de que en Ferrol hai un goberno desbordado, paralizado e outras cousas máis, acudo aos datos”, explicou Mato para enumerar a continuación as cifras recollidas nos portais de transparencia do Concello e de contratación do sector público. “Levamos gobernando dende o 2019. O volume de licitación neses tres anos é de 28,7 millóns de euros. Entre o 2015 e o 2019 adxudicáronse 14,6 millóns de euros. E entre o 2011 e o 2015, tamén en catro anos, con 13 concelleiros, adxudicáronse 26,6 millóns de euros. “Ese goberno desbordado, paralizado, que non fai o seu traballo, en só tres anos adxudicou 2,4 millóns de euros máis que o goberno de 13”, relatou antes de avanzar que neste momento se atopan en proceso de licitación contratos por un valor de 4,1 millóns de euros máis, co que a cifra nos vindeiros meses se incrementará ata os 32,8 millóns. 


Repasou algunhas das actuacións que se realizaron dende o 2019 en materia de obras, como a rehabilitación de edificios en Recimil, o cambio de firmes na praza do Callao e na rúa Lugo, a reparación de estradas como a que une Papoi con Mandiá, a avenida de Esteiro, a avenida do Mar, o novo acceso ao cemiterio de Serantes, a reurbanización da rúa Espartero e de Carme Curuxeiras, a urbanización de Basanta, a rehabilitación da torre da batería baixa de San Ferlipe, a estrada Catabois-Mandiá ou a ampliación da estrada de Pazos, e lembrou que neste momento hai en marcha destacadas intervencións como son o parque de Fontelonga, a rúa da Igrexa, a rúa de Pardo Baixo ou a reparación de Cidade Xardín, ás que de forma inminente se van unir a reparación das cubertas do mercado da Magdalena e do edificio do Concello. 

Máis prazas de aparcamento creadas que as que se eliminaron 
O alcalde asegurou que nese conxunto se pode ver o seu modelo de cidade, máis humana, onde as persoas recuperen o espazo público, buscando alternativas ao estacionamento dos vehículos nas rúas. Nese senso, lembrou que dende a súa chegada ao goberno local se crearon máis prazas de aparcamento gratuíto que as que se eliminaron, en referencia ás 256 que suman “os dous únicos aparcadoiros públicos municipais que se crearon en Ferrol en moitos anos”, como son o de Canido (133) e o do CHUF (123), aínda que nalgún deses casos non lle parecera “a mellor opción”. 

Aínda así, asegurou que o goberno local traballa para habilitar novos espazos que dean cabida aos vehículos privados para que non ocupen as rúas.   

Outros asuntos sobre os que incidiu o rexedor respecto á xestión destes tres anos foron a rehabilitación de vivenda (punto no que quixo destacar a contribución económica do Estado), o traballo desenvolvido polo Concello durante a pandemia á hora de garantir os servizos e os empregos e de proporcionar equipos de protección nos lugares máis necesitados deles, o soporte dato aos pequenos empresarios a través de catro programas de axudas nos que Concello e en parte a Deputación mobilizaron arredor de catro millóns de euros, ou o arranxo de problemas históricos. Entre estes últimos mencionou Cidade Xardín, a recuperación dos fondos do Ateneo, o inicio da remodelación da avenida das Pías ou o desbloqueo da ampliación do hospital. Ademais, nos próximos meses está previsto, avanzou, iniciar a licitación do derrubo da nave provisional do mercado e someter ao pleno tanto as contas de Emafesa coma o protocolo de execución concertada coa empresa de augas e o convenio co Ministerio de Defensa.  

Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar