Na sesión de hoxe o Partido Popular solicitou máis tempo para formular achegas, polo que ata o venres poderá presentar propostas que se debaterán nunha nova comisión, a o do próximo mércores, xunto coas que xa presentou o BNG. O obxectivo do goberno local, insistiu Reina, tras presentalo aos grupos hai dous meses, “é sometelo ao pleno deste mes e non demoralo máis”, dixo, posto que é un trámite “imprescindible para que a cidade reciba fondos europeos da estratexia EDUSI, entre outras axudas económicas”. 

O PMUS 2021 está composto polo Plan de Mobilidade e Espazo Público redactado en 2009 xunto coa addenda ao mesmo, que diagnostica a situación actual de Ferrol en materia de mobilidade desde a redacción do PMUS 2009 ata mediados de 2021. Dita addenda revisa as propostas e os obxectivos que perseguía o PMUS 2009 tendo como referencia tanto a sustentabilidade como a mobilidade sostible e o actual modelo de cidade para coñecer o seu grao de implantación, tal e como explicou Reina. Tamén pormenoriza a diagnoses e os obxectivos nos diferentes modos de desprazamento que se dan na cidade. Trátase dunha actuación cofinanciable nun 80% polo Fondo Europeo de Desarrollo Rexional (Feder) no marco do Programa Operativo Plurirrexional de España Feder 2014-2020. Estratexia de Desenvolvemento Urbano Sostible e Integrado (EDUSI) “RÍA DE FERROL, CIDADE 2020”.

Unha vez aprobado polo pleno de Ferrol, o PMUS 2021 someterase a exposición pública no Taboleiro de Anuncios do Concello e no BOP por un prazo de 30 días co fin de que poidan examinar o expediente as persoas interesadas. Unha vez rematado este proceso procederase a súa aprobación definitiva no pleno. 

O concelleiro de Mobilidade destacou hoxe que é “necesario” que o Concello de Ferrol, ao igual que o resto de administracións locais, dispoñan dun Plan de Mobilidade Sostible “para que a cidade reciba fondos europeos da estratexia EDUSI, fondos do Ministerio de Transportes, Movilidad y Agenda Urbana (MITMA) ou do goberno autonómico destinados a mellorar o transporte público urbano ou metropolitano, así como a outras axudas relacionadas coa accesibilidade nos espazos de uso público”. Estas subvencións permitirían que Ferrol “avance cara a un modelo de cidade máis sostible, seguro e saudable”. 

Neste senso, Reina lembrou que un dos proxectos para a cidade que están condicionados á aprobación do PMUS 2021 é a reurbanización completa do primeiro quilómetro da estrada de Castela, desde a Praza de España. 

O concelleiro explicou que a redacción do PMUS 2021 contou na súa primeira fase participativa coa implicación dos distintos grupos e colectivos a través da Mesa da Mobilidade. Trátase, dixo, dun documento “no que o conxunto da cidadanía ferrolá pode sentirse representado” posto que recolle “os puntos que nos une máis que os que nos separan”. 

O responsable de Mobilidade explicou que a addenda contextualiza o PMUS 2009 ao momento actual, tanto a nivel global como local, no que “desde os concellos debemos contribuír a facer fronte a grandes retos”. O PMUS do ano 2009, “exhaustivo, rigoroso e solvente”, apuntou, non foi aprobado en pleno, polo que “foi necesario actualizalo ante a situación actual da cidade e incluíndo novos retos desde as diferentes perspectivas”. Neste senso, Reina indicou que o PMUS 2021 é unha ferramenta para “mellorar a mobilidade e a calidade de vida da sociedade dun xeito estratéxico, compartido e consensuado para a súa eficaz implantación”. 

O PMUS 2021 establece un total de 21 medidas a implantar nos próximos anos segundo cada un dos modelos de desprazamento: o que corresponde á mobilidade a pé, en bicicleta, en transporte público e, por último, en vehículo privado. 

O primeiro apartado inclúe a aprobación da ordenanza municipal de accesibilidade de Ferrol, tamén mellorar a calidade do espazo público, avanzar no programa de camiños escolares seguros e na peatonalización do centro da cidade con máis espazo para o peón, implantar unha rede de itinerarios de prioridade peonil na zona urbana e corredores verdes no rural, planificar actividades que impliquen o maior uso do espazo público e a creación dun departamento de mobilidade. En canto á mobilidade en bicicleta contémplase mellorar o sistema de bicicletas compartidas con máis puntos de estacionamento e bicicletas eléctricas, implantar unha rede urbana segura para os ciclistas, outra na zona rural conectada co centro e coa rede de buses e desenvolver campañas de sensibilización sobre os beneficios do uso da bicicleta. 

O PMUS 2021 recolle en relación ao uso do transporte público a implantación de liñas orientadas ao fomento do comercio local e a conexión entre barrios, outras tipo lanzadeira que conecten estacionamentos disuasorios co centro urbano, un plan de mellora das paradas e da accesibilidade, ofrecer un servizo municipal de transporte segundo a demanda no rural, promover a recuperación do transporte marítimo e ferroviario, planes de mobilidade que conecten con grandes centros de traballo e o desenvolvemento de campañas de concienciación cidadá sobre a rede de autobuses.

Por último, e en relación ao uso do vehículo privado, o PMUS 2021 contempla, entre outras cosas, establecer unha xerarquía viaria orientada ao cumprimento da lei de cambio climático e co fin de avanzar na planificación do espazo público, o deseño dun plan de estacionamento.