Novas

xoves, 16 de xuño de 2022

Os campamentos de verán do Concello recibiron un total de 253 solicitudes

A listaxe provisional publicarase proximamente no Taboleiro de Anuncios municipal, no enlace: https://www.ferrol.gal/Sede/TaboleiroAnuncios


Os campamentos de verán do Concello de Ferrol recibiron un total de 253 solicitudes e a listaxe provisional publicarase proximamente no Taboleiro de Anuncios municipal, no enlace https://www.ferrol.gal/Sede/TaboleiroAnuncios, tal e como explicou esta mañá a concelleira de Muller e Igualdade, Cristina Prados, tras a comisión informativa de hoxe de Benestar Social, Igualdade, Muller, Xuventude e Patrimonio Histórico. 


A concelleira tamén deu conta da programación con motivo do Día do Orgullo LGBTI 2022, que terán lugar o día 1 de xullo. Ás 19 horas, no Teatro Jofre, celebrarase unha xornada de debate na que participará Noemí Díaz Vázquez, enxeñeira de montes, docente e profesora de ESO coa ponencia ‘Visibilización e retos LGBTI+ na Educación’. Tamén intervirá coa charla ‘Diversidade nas Administracións Públicas’ Mercedes Rosón Ferreiro, activista, colaboradora en diferentes asociacións do colectivo e primeira tenente de Alcalde e concelleira de Urbanismo, Vivenda, Acción Social e Igualdad no Concello de Santiago. 

Tras a xornada de debate terá lugar, ás 20.30 horas, unha actuación musical de balde ata completar aforo a cargo de Mounqup, francesa afincada en Ourense desde 2011 e gañadora do Premio Martín Codax 2017 á mellor artista de música electrónica de Galicia, entre outros. 

Ademais, o Concello de Ferrol súmase á campaña ‘Libre de ser e sentir’, da Deputación da Coruña, á que dará visibilidade, e procederá ao acendido coas cores do arco da vella da fachada do Teatro Jofre desde o martes 28 de xuño ao domingo 3 de xullo. Ademais, colocaranse carteis informativos nos comercios, nos muppis e repartiranse pulseiras coas cores do arco da vella. 

Lista provisional para becas comedor e axudas para material escolar 
Pola súa banda, a concelleira de Benestar Social, Eva Martínez Montero, trasladou aos grupos municipais que mañá se publicará no Taboleiro de Anuncios do Concello de Ferrol a listaxe provisional de beneficiarios das becas que sufragarán o total do servizo de comedor escolar durante o próximo curso escolar e das axudas económicas para adquirir material escolar. Os solicitantes que quedaron fora terán un prazo de 10 días hábiles a partir do luns, 20 de xuño, para subsanar a documentación. 




Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar