Mato lembrou que o pasado 13 de maio lle solicitou á subdelegada precisamente o que se vai materializar nas vindeiras semanas: un incremento do número de axentes que traballan na cidade. “A nosa é unha cidade segura e tranquila, e para seguir mantendo esa seguridade é importante que os nosos corpos de seguridade conten con cadros de persoal suficientemente amplos”, dixo o rexedor antes de recordar que, por parte do Concello, durante os últimos anos realizáronse incorporacións á Policía Local para aproximarse aos cen efectivos. “Hoxe comprobamos o mesmo compromiso por parte do Goberno”, destacou. 

Así, só un mes despois de formulada a petición, “a subdelegada vén de anunciarnos que se van sumar á comisaría de Ferrol 25 axentes, 3 oficiais e 8 alumnos en prácticas”, 36 novos efectivos que se engadirán aos 196 cos que xa conta o Corpo Nacional de Policía na cidade. Isto, continuou Ángel Mato, “contribuirá aínda máis a incrementar a colaboración e a coordinación entre Policía Nacional e Policía Local”. 

Rivas explicou que o desenvolvemento de convocatorias de emprego público durante os últimos catro anos fai agora posible que se estea a dotar de máis persoal comisarías coma a de Ferrol, en contraposición ao que ocorría antes do 2018, cando, asegurou, a falta desas convocatorias derivou nunha mingua moi significativa nos cadros de persoal do Corpo Nacional de Policía.