Novas

xoves, 23 de xuño de 2022

O alcalde anuncia o remate da nova cuberta do pavillón de Esteiro e destaca que a instalación deportiva gañará modernidade, accesibilidade e seguridade

Ángel Mato visitou o transcurso das obras de rehabilitación e mellora da accesibilidade que o Concello está a executar na instalación por importe de preto de 300.000 euros. O edificio contará por primeira vez cun elevador de acceso ás bancadas e reforzará o sistema contraincendios e de ventilación. Está previsto que os traballos rematen a finais de verán


O alcalde anuncia o remate da nova cuberta do pavillón de Esteiro e destaca que a instalación deportiva gañará modernidade, accesibilidade e seguridade

 O alcalde de Ferrol, Ángel Mato, comprobou esta semana as obras de rehabilitación e mellora da accesibilidade que o Concello está a executar no pavillón polideportivo de Esteiro por importe de preto de 300.000 euros. O rexedor anunciou que esta semana rematou a instalación da nova cuberta do edificio, que xa conta con dúas planchas metálicas e entre elas outra capa de illante a base de lana de roca, un material que contribúe a combater as humidades que ata o momento sufría a dependencia municipal. 


O alcalde, que estivo acompañado polos responsables da empresa que executa o proxecto, o concelleiro de Deportes, Antonio Golpe, e o de Urbanismo, Julián Reina, explicou que a nova cuberta poñerá fin ás humidades e filtracións que sufría o pavillón de Esteiro antes das obras. “Estamos a executar unha intervención de importante calado, con nova iluminación, un elevador, un mellor sistema contraincendios e de ventilación para mellorar e modernizar este pavillón no que tantos veciños practican deporte”, indicou Mato tras a visita. “Queremos que o fagan nas mellores condicións”, apuntou. En definitiva, dixo, “grazas ás obras o pavillón deportivo gañará modernidade, accesibilidade e seguridade”. 

Tamén se substituirán as canles de desaugue da cuberta por outras de aceiro inoxidable, repararase o tellado dos locais anexos e a cuberta plana de vestíbulo e vestiarios, arranxaranse as escaleiras da saída de emerxencia das bancadas e a substituiranse as portas en mal estado, entre outras actuacións.

O pavillón contará cun elevador e renovará o sistema de iluminación 
O alcalde tamén comprobou as obras que o Concello está a executar para instalar un elevador de acceso ás bancadas, ata agora inexistente, o que permitirá que as persoas con mobilidade reducida poidan ver as probas deportivas dende a grada e non a pé de pista, como debían facer ata o momento. Deste xeito, por unha banda disporán de espazo a carón de todo o público e, por outra, gañarán en seguridade ao situarse a distancia da pista. Outra medida incluída no proxecto é a instalación dun sistema de sinal de chamada de asistencia no vestiario accesible. 

O alcalde explicou que o proxecto inclúe a renovación total da iluminación do polideportivo, que mantenía a instalación de finais dos anos 90. Ao rematar as obras, recalcou, o edificio “contará cun moderno sistema de tecnoloxía led específica para instalacións deportivas”, de alta calidade, que supoñerá “un importante aforro enerxético para o Concello”, apuntou Mato. 


Mellor ventilación e reforzo do sistema contraincendios 
Mellorarase o sistema de ventilación do pavillón, que pasará de contar con dous ventiladores a catro, e de mellor calidade. En canto á seguridade, abriranse dúas saídas de emerxencia na pista e repararase a que existe na zona das bancadas. En ambos casos instalaranse portas antilume de dúas follas con mecanismos de apertura de barra antipánico. 

As obras que está a executar o Concello tamén van reforzar o actual sistema contraincendios. Habilitaranse sete bocas de incendio equipadas e trece extintores, dous deles de CO2 xunto aos cadros eléctricos, ademais dunha central de alarma con sistema de detección de incendios, e renovarase a iluminación de emerxencias. 

No referido á pista, contémplanse reparacións puntuais na tarima, mediante substitución de táboas en mal estado, lixado e vernizado de elementos. Os parafusos de ancoraxe da varanda das bancadas serán substituídos. Todas estas actuacións completaranse co saneamento e pintado de todos os paramentos interiores, a reparación de gretas existentes na fachada, a limpeza de xuntas e aplicación de morteiro. Está previsto que os traballos rematen a finais de verán.





Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar