Novas

xoves, 23 de xuño de 2022

O Concello colaborará no Campionato Galego de Waterpolo cadete mixto de verán, que terá lugar o sábado na piscina municipal Javier Gómez Noia

O concelleiro de Deportes, Antonio Golpe, presentou esta mañá o evento deportivo xunto ao tesoureiro do Club Marina Ferrol, José Aneiros, e o secretario xeral da Federación Galega de Natación, Ramón Mosquera


O Concello colaborará no Campionato Galego de Waterpolo cadete mixto de verán, que terá lugar o sábado na piscina municipal Javier Gómez Noia

O Concello de Ferrol vai colaborar na celebración do Campionato Galego de Waterpolo Cadete Mixto de Verán, que terá lugar o próximo sábado, 25 de xuño, na piscina municipal Javier Gómez Noia. O concelleiro de Deportes, Antonio Golpe, presentou esta mañá o evento deportivo xunto ao tesoureiro do Club Marina Ferrol, José Aneiros, e o secretario xeral da Federación Galega de Natación, Ramón Mosquera. 


O edil animou á poboación a acudir ao campionato xa que despois dun tempo de restricións, “nesta ocasión o acceso do público non estará limitado”, e destacou o intenso labor que está a desenvolver o Club Marina Ferrol na promoción do waterpolo, especialmente entre a xente máis nova, e na organización do evento do sábado. Pola súa banda, Aneiros agradeceu ao Concello de Ferrol a cesión da piscina municipal Gómez Noia para o campionato e explicou que participarán nenas e nenos nados nos anos 2006 e 2007. Ao longo da mañá, de 11 a 14.30 horas, celebrarase a fase eliminatoria e pola tarde, a partir das 17.30 horas, a final. A entrega de premios está prevista a partir das 19.30 horas. 

Pola súa banda, Mosquera quixo resaltar do Concello de Ferrol a súa “aposta polo deporte” e a súa disposición a “ceder sempre as instalacións municipais tanto para campionatos como para a actividade diaria dos clubs”. É un exemplo, dixo, “para outros concellos”. O secretario xeral da Federación Galega de Natación tamén destacou o papel que desenvolve o Club Marina Ferrol na promoción do waterpolo e o aumento nos últimos anos da participación feminina nesta disciplina. 

Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar