Novas

martes, 24 de xaneiro de 2023

O goberno local levará esta semana a pleno a addenda ao convenio co Consorcio pola que se ampliará o número de prazas para o servizo social ‘Xantar na Casa’

O Concello de Ferrol solicitou en tres ocasións ao organismo pertencente á Xunta sumar 15 ás 55 actuais


O goberno local levará ao próximo pleno, que terá lugar este xoves 26 de xaneiro, a proposta de aprobación da addenda ao convenio de colaboración entre o Consorcio Galego de Servizos de Igualdade e Benestar da Xunta de Galicia e o Concello de Ferrol para o desenvolvemento na cidade do programa social ‘Xantar na Casa’. Dita addenda recolle unha nova ampliación no número de prazas despois de que o Concello lograra recentemente un “significativo aumento” en canto á oferta, ao sumar 15 ás 55 actuais, segundo explicou a edil de Benestar Social, Eva Martínez Montero. 


A responsable municipal lembrou que tras solicitar ao Consorcio en tres ocasión unha nova ampliación no número de prazas no servizo, o organismo comunicou hai uns días ao Concello a aceptación da solicitude realizada pola Administración local, polo que se chegará a 70 prazas nun programa de “vital importancia para as persoas maiores de Ferrol” e que acumula “unha gran demanda”, explicou. A edil reuniuse o pasado venres co xerente do Consorcio, Perfecto Rodríguez, para abordar esta nova ampliación de prazas e outros asuntos de interese social para a cidade vinculados ao organismo. En canto aos centros de día de Caranza e Telleiras, trasladoulle as demandas recollidas en canto ao “deficiente” estado de mantemento do de Caranza. Ademais, comunicoulle a “preocupación que existe en canto á situación do persoal das escolas infantís” de Caranza e Esteiro e presentoulle as demandas recollidas en canto ao seu mantemento. Por último, abordaron dar impulso á adxudicación de prazas en ditos centros de día. 

Utilizamos cookies propias e de terceiros para mellorar a experiencia de navegación, e ofrecer contidos personalizados. Ao continuar coa navegación entendemos que se acepta a nosa política de cookies.

Pechar