Web Municipal do Concello de Ferrol

Inicio Concello De actualidade Novas

Comparte esta páxina

martes, 24 de xaneiro de 2023

O goberno local ultima os trámites do convenio con Defensa co fin de elevalo a pleno o próximo mes

Ángel Mato reuniuse en Madrid con responsables do Invied para analizar os derradeiros pasos que debe dar o expediente. O alcalde explicou que xa está lista a resolución das alegacións ao proxecto de equidistribución do cuartel Sánchez Aguilera

O goberno local prepara os derradeiros trámites para elevar a pleno o convenio entre o Concello de Ferrol e o Instituto de Vivenda, Infraestrutura e Equipamento da Defensa (Invied), un paso que se podería materializar o próximo mes, segundo explicou o alcalde, Ángel Mato, tras reunirse o pasado venres en Madrid co director xerente do Invied, o xeneral de brigada Sebastián Marcos Morata, e o subdirector xeral de Técnica e de Alleamentos do mesmo organismo, o coronel Mario Talavera Iniesta. O antedito convenio, asinado o 25 de marzo do 2015 polo entón alcalde de Ferrol, José Manuel Rey, e o entón director xerente do Invied, Fernando Villayandre, debe ser sometido á ratificación da corporación municipal, xa que no seu momento quedaron varios trámites pendentes para que se dera por pechado definitivamente. Mato explicou que se trata do mesmo documento, xa que o actual goberno local decidiu recuperalo sen cambiarlle “nin un punto nin unha coma”.

Durante a reunión, na sede do Invied, o rexedor avanzoulles ao director xerente e ao subdirector a intención de elevar o convenio ao pleno e seguidamente resolver oficialmente as tres alegacións presentadas ao proxecto de equidistribución do Plan Especial de Reforma Interior PERI-2-R Sánchez Aguilera, presentadas polos grupos municipais do PP e do BNG e un particular. Segundo explicou Mato, a documentación referida á resolución xa está lista para ser aprobada.

O do antigo cuartel é o ámbito máis destacado do convenio, por afectar a unha superficie próxima aos 90.000 metros cadrados e por localizarse dentro do casco urbano, pero o convenio afecta, ademais, ás seguintes parcelas que pasarían a ser de propiedade municipal:

-Polvorín de Mougá (210.877 metros cadrados).

-Polígono de Tiro de Catabois (15.980).

-Cuartelillo de San Luís, en Canido (4.027).

-Campamento de Covas (487.798).

-Cuartelillo de Monte Covas (6.694).

-Polígono de Tiro de Doniños (86.583)

-Estación Torpedista da Armada, en San Felipe (20.261).

-Observatorio Meteorolóxico de Monteventoso (117.070)

Pola súa banda, co Convenio aprobado o Concello adquiriría tamén a antiga estación de radio de Mandiá (125.338 metros), que contribuiría á creación de solo industrial no termo municipal.