O centro cultural Torrente Ballester é o escenario principal deste festival que se celebra durante toda a fin de semana con actividades na súa meirande parte gratuítas. A inauguración será ás 15.30 e durante toda a tarde desenvolveranse charlas e mesas redondas e haberá ademais unha exposición de editoriais.

As actividades desta segunda xornada tratarán temáticas como o terror en formato curto, o romance ou os sistemas políticos nos xéneros fantásticos, vampiros, piratas ou os mecanismos do medo. Tamén se abordarán o xénero da fantaciencia ou a produción fantástica de Emilia Pardo Bazán. Haberá unha jam session e un concurso de microrrelatos.

Montserrat Martí segue a herdanza da súa nai, a lendaria soprano Montserrat Caballé. Acompañada polo barítono Luis Santana e o pianista Víctor Carballo presentará en Ferrol un recital de ópera e zarzuela con fragmentos de obras de Giuseppe Verdi, Gaetano Donizetti, Gioachino Rossini, Wolfgang Amadeus Mozart, Fernando Obradors, Manuel de Falla, Manuel Penella, Gerónimo Giménez, José Serrano e Federico Moreno Torroba.

Algúns dos temas que se tratarán nesta última xornada serán as viaxes no tempo, a literatura do humor, as criaturas fantásticas, os aliens ou a historia do rol en galego. Igualmente celebraranse talleres de creación literaria infantil e xuvenil e dous obradoiros "project droid".

Organizado pola Sociedad Filarmónica Ferrolana, o concerto da Real Filharmonía de Galicia inclúe no programa a estrea en España da obra do pianista Fazil Say “Yürüyen Kösk” (A mansión andante) interpretada polo propio compositor. Tamén se interpretarán o Concerto para piano núm 21 k.467, en Do maior, de Wolfgang Amadeus Mozart e a Sinfonía núm 7, op.92 en La maior de Ludwig van Beethoven. A dirección corre a cargo de Can Okan.

A obra orixinal de Steven Berkoff adaptada por Benjamín Prado e dirixida por Pedro Casablanc retrata en clave de comedia ácida a alta sociedade, coa súa forma de pensar e os seus vicios. Un brillante exercicio interpretativo de Maru Valdivieso e o propio Casablanc coa súa falsa elegancia, a súa desfachatez e a súa poderosa atracción. Teatro para adultos (en español).

Fredi Leis é un intérprete, músico, produtor e compositor galego, artista cun estilo moi propio destacado polas súas letras poéticas, melodías sinceras e arreglos intimistas. No 2022 anuncia o seu segundo álbum de estudio, "Temas Privados", un proxecto con 10 cancións inéditas, compostas desde cero e para este disco. Durante estes dous anos, o artista galego ten traballado nun momento vital diferente e especial, que deu como resultado este novo álbum, que viu a luz o pasado mes de maio. Entradas desde 10€

Las Niñas de Cádiz presentan en “El viento es salvaje” unha obra ao estilo das clásicas traxedias gregas que se fusiona co xénero musical da chirigota creando unha peza completamente única en clave de comedia. Dúas figuras da mitoloxía grega, Fedra e Medea, envólvense nun enfrontamento motivado polos celos, a culpa, as paixóns e os amores prohibidos coa cidade de Cádiz como pano de fondo. En castelán.

Jandro, o mago e humorista que conduce “Mapi” na TVE e que durante 14 temporadas sorprendeu ás celebridades no exitoso programa de televisión “El Hormiguero”, presenta “Descabellado”, un espectáculo de maxia divertido, orixinal, moderno e sorprendente, sen trucos de cámara nin ganchos. Jandro é un dos rostros máis coñecidos da televisión española que recala na cidade tras recibir en catro ocasións consecutivas o prestixioso premio de maxia “Fool Us Trophy” en Las Vegas. En castelán. Entradas desde 15€

Unha oportunidade para gozar da música antiga interpretada por unha prestixiosa orquestra con 25 anos de traxectoria ás costas, da man da Sociedad Filarmónica Ferrolana. Con Leo Rossi, Miguel Romero e Valentín Sánchez como violíns, Elvira Martínez á viola, Mercedes Ruiz ao violonchelo, Ventura Rico no contrabaixo, David Antich e Alberto Domínguez como frautas de pico e Rafael Ruibérriz de Torres á frauta interpretarán unha selección dos Concertos de Brandenburgo de Johann Sebastian Bach. Entradas desde 6€.

Obra de técnica mixta que mestura o teatro de autor cos monicreques. Interpretada por Chisco Casteleiro, Raquel Queizás, Jona García e Vicky Pérez con un guion orixinal de Andrea Bayer, narra a historia do país de Golulá, onde todas as persoas eran diferentes pero aínda así se enendían. Golulá só ten unha nube, custodiada polo gorila Bunka, pero un día o malvado doutor Terrier róubaa e Bunka emprende unha viaxe chea de perigos para recuperala coa axuda da súa amiga Lara. En galego e castelán.

“Carreiro” é o primeiro traballo de estudo de Peña, o proxecto gañador dos premios Narf da Deputación da Coruña no 2021. A agrupación pontevedresa integrada por Toño Magariños (guitarra acústica e voz), Elena Vázquez (violín e voces) e Rubén Abad (guitarra eléctrica e voz) é toda unha revelación da música contemporánea en galego. O folk, o pop e as raíces mestúranse para crear cancións cheas de emoción e sensibilidade, sinxelas e que dan protagonismo ás voces.

A banda de pop barcelonesa Manel remata en Ferrol a xira de presentación do seu último álbum “Per la bona gent”, o quinto dos seus traballos discográficos desde o inicio da súa carreira musical no 2008. Sempre co catalán como lingua vehicular, os temas de Manel achéganse ao xénero pop e xogan con outros estilos como o folk e o groove nunha constante vontade de experimentación. Sen perder a súa esencia, a banda combina neste novo disco a tradición coa electrónica, o rap ou o indie. Entradas desde 10€.

Con "Yo, Mussolini", Leo Bassi posiciónase fronte á extrema dereita diante do auxe desta ideoloxía en todo o mundo. O espectáculo ten por obxectivo chamar a atención de quen loitan por unha vida máis solidaria e humanista e traslada unha mensaxe chea de optimismo e resistencia fronte á intolerancia, sempre desde o humor e a provocación.

Cineconcerto que propón unha viaxe ao cine mudo dos anos vinte con música en directo. En “O heroe do Río”, unha das mellores comedias de Buster Keaton, o protagonista trata de impresionar á súa noiva mentres se esforza por cumprir coas expectativas do seu pai. A acción desenvólvese no Mississippi, onde dous empresarios compiten polo control do transporte de mercadorías. Un deles é o pai do protagonista, que chega para axudar no negocio despois de estar estudando na cidade e namora da filla do rival.

CANCELADA! Laura Gómez-Lacueva, Ingrid Magrinyá e Inma Nieto realizan un espléndido traballo actoral para narrar unha historia triste, a de un diagnóstico inesperado que bota polo chan a vida cotiá de dúas mulleres con personalidades moi diferentes pero que asoman ao mesmo abismo. O seu autor, Eusebio Calonge, trata da busca da alegría no medio desta viaxe sen retorno. A dirección corre a cargo de Paco de la Zaranda.

Con "El salto del gitano", a banda Derby Motoreta's Burrito Kachimba iniciou no 2018 unha meteórica carreira coa que puxo de moda a "kinkidelia", o seu propio culto a un panteón de deuses e deusas entre a experiencia lisérxica e o macarra. Uns rapaces de barrio con fame de comer o mundo e dispostos a capitanear desde Andalucía unha nova rexeneración do rock español. O seu segundo álbum, "Hilo negro", consolida a súa traxectoria con melodías pegadizas que beben de diversas fontes de inspiración. Desde 10€.

Considerada unha das mellores voces galegas da súa xeración, o R&B, o soul e o jazz corren polas súas veas dende hai máis de dúas décadas. Ángeles Dorrio leva ás costas unha ampla carreira como solista en diversos grupos, que deixou atrás en 2013 para lanzarse en solitario co álbum “Ten Soul”. No 2021 publicou o seu último traballo, “Selegna”, un EP que gozou de gran recoñecemento na prensa.

O recoñecido pianista Javier Perianes dirixirá á Orquesta Sinfónica de Galicia nun concerto organizado pola Sociedad Filarmónica Ferrolana no que interpretará dúas obras para piano de Mozart: o Concerto para Piano núm. 23, K.488 en La maior e o Concerto para Piano núm. 20, K.466 en Re menor.

Ortiga é o proxecto musical de Chicho, un traballador da música criado nas verbenas e rodado en festivais que chega ao Jofre para dar conta tanto dos temas do seu segundo cancioneiro, “Sabes el camino que elegí”, como dese primeiro disco que editou en 2019 baixo o título “Chicho y sus chichas”. Salsa, merengue e cumbia mesturados co Auto-Tune típico do trap e letras, en galego e castelán, que falan da terra e da xente real son a aposta dun músico que vos quere facer “menear el bullarengue” e sorrir.

A compañía Estudo Momento rescata un clásico de Strindberg cunha iniciativa teatral comprometida co feminismo. A señorita Julia decide aproveitar unha ausencia do seu pai, o conde, para organizar unha festa secreta cos criados. Durante a velada seduce a Juan, criado predilecto do conde, e ambos caen nun perigoso xogo de paixón, violencia, inocencia e amor. A versión que propón Estudo Momento, interpretada por Xoán C. Mejuto e Iria Ares, arranca co suicidio da señorita Julia.

O humorista galego presenta o seu espectáculo LAGO (LA comedia de club lleGa al teatrO), puro stand-up clásico, comedia de club, de bar e de estrada. Un show sen artificios: un cómico sobre unha alfombra, baixo un foco e cun micro, cara a cara fronte ao público. Non hai máis. Unha viaxe na que Miguel Lago saca á luz todo o aprendido en máis de 20 anos de traxectoria nun espectáculo que se reescribe cada semana mirando aos ollos do espectador. Actuación en castelán. Entradas desde 10€.

Nova ocasión de escoitar á Orquesta Sinfónica de Galicia nun concerto organizado pola SFF con Juan Manuel Cañizares á guitarra e a dirección de Juanjo Mena. A OSG interpretará por primeira vez a Suite Española Granada, de Isaac Albéniz, na orquestración de Frühbeck de Burgos e o concerto Al-Andalus do propio Juan Manuel Cañizares. O programa inclúe tamén a Sinfonía núm.7 en La maior, op.92 de Beethoven.

A potente voz de Sabela King arroupada polas atmosferas sonoras creadas polos Heartbreakers encherá o escenario da Capela do Torrente Ballester nun espectáculo que transita polos clásicos do blues, o country e o soul, pero tamén por moitos dos temas do seu primeiro disco, con composicións propias e versións moi persoais de temas de reputados artistas como Sam Cooke ou Johnny Cash.

O cantante mallorquino irrumpeu na escea musical no 2019, cun estilo persoal e diverso que recolle rasgos do pop máis actual, o indie e o lofi, cunha estética colorista e xoguetona. Porén, o seu primeiro tema en solitario de 2022, "Agua salada", fusiona flamenco e reguetón, rompendo os seus propios esquemas estilísticos nunha evolución que consegue revalorizar e enriquecer a súa música.

Ponten Pie trae aos escenarios unha auténtica xoia visual para o público familiar na que se presenta o conflito interno de dous irmáns que rexeitan a súa condición de habitantes terrestres e desexan adaptarse a vivir baixo a auga, como a tribo asiática dos Bajau. O espectáculo transita polos derroteiros da imaxinación e a fantasía de ambos personaxes ata que cumpren o seu soño, conducindo entón ao público a un novo universo,

Alma (non é hippie), do colectivo Verticalia e Pista Catro, é o primeiro espectáculo de danza vertical de Galicia. Unha proposta escénica que artella a linguaxe da danza contemporánea, a verticalidade e o movemento para dar forma a diferentes e sutís percepcións sobre a mesma realidade.

Os históricos exploradores Magallanes e Elcano embárcanse na gran viaxe que dará a volta ao mundo na procura das illas Molucas. Unha aventura na que transitarán durante tres anos por camiños descoñecidos nos que lles agardan arestas, confusións e moitos misterios cos que rozarán a loucura. O proxecto teatral xorde a partir dos actos de celebración do V Centenario da Primera Volta ao Mundo.

A soprano turca Ezgi Alhuda ofrecerá, cun grupo de músicos da Orquesta Sinfónica de Galicia dirixidos por Massimo Spadano, un repertorio de lieder e cancións de cámara de Richard Strauss e Giuseppe Verdi. Organiza a Sociedad Filarmónica Ferrolana.

O ciclo “Os Xoves da Capela” conta coa presenza desta formación de Ferrolterra que achegará ao público a súa música de estilo propio con tinturas do folk galego, irlandés e escocés. O grupo, nado no 2002, foi galardoado no Festival Internacional do Mundo Celta de Ortigueira no ano 2016 co premio do Proxecto Runas e no concurso Folkez Blai no 2019.

A actriz María Casares regresa á patria da súa infancia tras corenta anos de exilio. A nena medrou para converterse nos escenarios franceses nunha gran actriz de teatro e da gran pantalla. Tras unha vida chea de éxitos e perdas, Casares regresa ao seu fogar, onde as pantasmas da memoria axudarana a afondar na súa existencia: quen é María? A peza mestura o cine en directo, o teatro e a música para percorrer os lugares e momentos da vida de María Casares nesta viaxe de retorno á terra.

A música de raíz celta feita en Galicia non se pode separar do selo do vigués Carlos Núñez, o noso gaiteiro máis internacional e considerado un dos mellores do mundo tras unha prolífica traxectoria. Como cada ano nas datas de Nadal, o artista prepara a súa tradicional xira coa que fará parada en Ferrol para deleitar ao público co seu abraiante talento, nun espectáculo cargado de emoción e sorpresas. Entradas desde 19€.