O próximo luns 16 de setembro comeza a instalación eléctrica, de rego, saneamento e iluminación

REMATA O RECHEO DO OCO DO ANTIGO APARCAMENTO DA PRAZA DE ARMAS

Ferrol, 12 de setembro de 2019.- Os traballos da remodelación da Praza de Armas estanse desenvolvendo a bo ritmo e actualmente se está a rematar o recheo do oco que ocupaba o antigo aparcadoiro con material reciclado compactado, finalizando esta actuación esta mesma semana.

O próximo luns, 16 de setembro, comezan os traballos para executar as instalacións urbanas, como electricidade, rego, saneamento e iluminación. Dita actuación alargarase dúas semanas. Tamén a próxima semana está previsto que se comece a formigonar subbases para recibir posteriormente os pavimentos pétreos, que se comezarán  a colocar aproximadamente na semana do 7 de outubro.
Plantación de arboredo

Será a principios de decembro cando se procederá á plantación do arboredo. O proxecto da remodelación da Praza de Armas contempla para o novo espacio 21 tilos americanos de 10 metros de alto e copa amplia de 6 metros de diámetro. Na segunda semana de decembro, procederase á execución do pavimento terrizo estabilizado.
Co bo ritmo das obras, e se non hai imprevistos, a nova praza quedará aberta para o uso público nas próximas festas de Nadal.

As obras da praza de Armas son unha operación cofinanciable polo Fondo Europeo de Desarrollo Regional (FEDER) no marco do Programa Operativo FEDER Plurirregional de España 2014-2020 ao abeiro da Estrategia de Desarrollo Urbano Sostenible e Integrado (EDUSI) “Ría de Ferrol, Cidade 2020”.